QHA sybaılas jemqorlyqqa qarsy mádenıetti qalyptastyrýǵa atsalysady

ASTANA. QazAqparat - QR Memlekettik qyzmet isteri jáne sybaılas jemqorlyqqa qarsy is-qımyl agenttigi Qazaqstan xalqy Assambleıasymen birlese otyryp, xalyq arasynda sybaılas jemqorlyqqa qarsy mádenıetti qalyptastyrýdy kózdeıdi. Osyǵan oraı, búgin memlekettik organ men qoǵamdyq uıym arasynda ózara áriptestik týraly memorandýmǵa qol qoıylyp, birlesken is-sharalar jospary bekitildi, dep xabarlaıdy QazAqparat tilshisi.

Qazaqstan xalqy Assambleıasy tóraǵasynyń orynbasary Darxan Myńbaıdyń aıtýynsha, sybaılas jemqorlyqqa qarsy mádenıetti qalyptastyrý sharalaryna Assambleıanyń barlyq aımaqtyq qurylymdary atsalysatyn bolady.

"Qazaqstan xalqy Assambleıasy Elbasynyń basshylyǵymen elimizde júrgizilip jatqan jemqorlyqqa qarsy kúreske, osy baǵyttaǵy jumystardy ilgeriletýge, ony qoǵamda keń kólemde nasıxattaýǵa óz úlesin qosýy tıis dep sanaımyz. Ekijaqty birlesken naqty is-qımyldy kózdeıtin qujatty iske asyrýǵa Qazaqstan xalqy Assambleıasy tarapynan onyń barlyq óńirlik qurylymdary, qoǵamdyq kelisim keńesteri, ǵylymı-sarapshylyq toptary men etnomádenı birlestikteri qatysatyn bolady", - dep atap kórsetti Myńbaı. Agenttik tarapynan ol qujatqa tóraǵanyń orynbasary Alık Shpekbaev qol qoıdy.

Birlesken is-sharalar josparyna sáıkes, respýblıka boıynsha ornalasqan etnıkalyq teatrlarda arnaıy kontsertter men qoıylymdardy uıymdastyryp, san alýan túsindirý jumystaryn júrgizý kózdelgen. Buda bólek, Qazaqstandaǵy etnostar sóleıtin tilderde sybaflas jemqorlyqqa qarsy beıne jáne aýdıo rolıkterdi taratý josparlanyp otyr.