QHA shaǵyn jáne orta bıznesti damytýǵa kúsh salady - Janseıit Túımebaev
QHA kásipkerler qaýymdastyǵy 2011 jyldan beri jumys isteıdi. Búginde onyń quramynda 200-den astam kásiporyn men bıznes-birlestikter bar. Qazaqstannyń barlyq óńirinde qaýymdastyq ókildikteri ashylǵan.
«Elbasy Qazaqstan halqy Assambleıasynyń aldyna qoıǵan mindetterdiń biri - kásipkerlikti damytý bolatyn. Bıyl 29 sáýirde ótken XXVII sessııada Elbasy Assambleıanyń kásipkerler qaýymdastyǵynyń qyzmetin jańa deńgeıge shyǵarýdy, onyń quramyn bıznes-qaýymdastyqtyń úzdik ókilderimen tolyqtyrýdy tapsyrdy. Ótken jyly Nur-Sultan qalasynda qaýymdastyqtyń barlyq jumysyn úılestirip, kásipkerlermen keri baılanysty qamtamasyz etetin biryńǵaı front-ofıs ashyldy. Bıznesti qoldaý úshin vırtýaldy alań formatynda bıznes-ınkýbator men kooperatsııa jáne ımporttyń ornyn basý ortalyǵy jumys isteıdi», - dep atap ótti Janseıit Túımebaev elordada ótken «Tsellıýloza-qaǵaz ónerkásibi men qaptama ındýstrııasyn damytý» forýmynda.
Onyń aıtýynsha, 2016 jyly óńdeý ónerkásibindegi jalpy ımport kólemi 7 trıllıon 342 mıllıard teńgeni nemese suranystyń 62% quraǵan. Bul úlken naryqty qazaqstandyq óndirýshiler, ásirese jastar ıemdenýi tıis.
«Ótken jyly belsendi jastardyń atsalysýymen jastar startaptary men bıznes-ıdeıalaryn irikteıtin sarapshylyq keńes quryldy. Qaýymdastyqtyń jas kásipkerler keńesi jumys istedi. Elordanyń №83 mektep-gımnazııasynda balalarǵa bilim beretin tehnopark ashyldy. Qaýymdastyq alańynda turaqty túrde start-ap avtorlarymen, ınvestorlarmen kezdesý ótedi. Innovatsııalardy damytý men agrosektorǵa jańa tehnologııalardy engizý maqsatynda Ǵylymı-ınnovatsııalyq ortalyq ashyldy. Sonymen birge, AÓK salasynda jańa formattaǵy mamandardy ázirleý úshin, jańa menedjerlerdi daıarlaý úshin oqytý ortalyǵyn ashý josparlanǵan», - deıdi ol.
QHA kásipkerler qaýymdastyǵynyń kómegimen «Orman qurylys» konsortsıýmy, «ZHASAMPAZ» otandyq jeńil ónerkásip óndirýshileriniń uıymy, «Jańa aýyl» salaaralyq konsortsıýmy qurylǵan.
«Degenmen, jumysymyzdyń basty baǵyty - qarapaıym zattar ekonomıkasy men jumys oryndaryn qurý bolyp qala beredi. Bul - elimizdiń áleýmettik baqýattylyǵynyń negizgi kúshi - shaǵyn jáne orta bıznes salasy. Odan bólek, kásipkerler men etnomádenı birlestikter tarıhı otandaryndaǵy tehnologııalar men ınvestıtsııalar transfertin damytýǵa baǵyttalady. Osynyń arqasynda, QHA kásipkerler qaýymdastyǵy shaǵyn jáne orta bıznesti damytýdyń jańa ortalyǵyna aınaldy. Qazirgi ýaqytta qaýymdastyqqa jańa qatysýshylardy qosý jumystary belsendi júrip jatyr», - deıdi Janseıit Túımebaev.
