QHA Ózbekstanda jalpyulttyq birliktiń qazaqstandyq úlgisin tanystyrdy
Delegatsııa quramyna Qazaqstan halqy Assambleıasy Tóraǵasynyń orynbasarlary E.L.Toǵjanov, R.S. Halmýradov, QHA Ǵylymı-sarapshylyq keńesi tóraǵasynyń orynbasary, QR Prezıdenti janyndaǵy Memlekettik qyzmet akademııasy Ortalyq Azııa óńirindegi etnosaralyq jáne konfessııaaralyq qatynastardy zertteý ortalyǵynyń basshysy A.K.Sádýaqasova, Qazaqstan ózbekteri «Dýstlık» qaýymdastyǵynyń tóraǵasy I.A.Hashımjanov, Ońtústik Qazaqstan oblysy máslıhatynyń depýtaty B.I.Nyshanqulov, sondaı-aq «Qazaqstan káristeriniń qaýymdastyǵy» QB, «TAŃ» tatar-bashqurt mádenı ortalyǵy» QB, «Qazaqstan uıǵyrlarynyń respýblıkalyq mádenı ortalyǵy» QB ókilderi kirgen.
Delegatsııa Ózbekstan Respýblıkasynyń Ólıı Májilisi Zań shyǵarý palatasy spıkeriniń orynbasary B.Alıhanovpen, Ózbekstan Respýblıkasy Ólıı Májilisi Senatynyń birinshi orynbasary S.Safaevpen, Ózbekstannyń Respýblıkalyq ınternatsıonaldyq mádenı ortalyǵynyń dırektory N.Muhammadıevpen birqatar qos taraptyq kezdesýler ótkizdi.
Kezdesý barysynda Qazaqstan men Ózbekstannyń ózara is-qımyl jasaýynyń ózekti máseleleri, qoǵamdyq kelisim men birlikti qamtamasyz etý, azamattyq biregeılikti nyǵaıtý tájirıbesi qaralyp, yntymaqtastyqtyń jańa vektorlary, sondaı-aq Qazaqstan halqy Assambleıasy men Ózbekstannyń Respýblıkalyq ınternatsıonaldyq mádenı ortalyǵy arasynda memorandýmǵa qol qoıý nıeti týraly sóz boldy.
Ózbekstandaǵy Qazaq ulttyq mádenı ortalyǵynyń basshylyǵy men belsendi múshelerimen kezdesý sapardyń negizgi is-sharalarynyń biri boldy. Onyń sońynda Qazaqstan halqy Assambleıasynan syı - kompıýterlik tehnıka men qazaqstandyq avtorlardyń qazaq mádenıetine, qoǵamdyq kelisim men birlikke arnalǵan kitaptary tabys etildi.
Ózbekstannyń etnomádenı birlestikter ókilderi jáne sarapshylary QHA delegatsııasynyń múshelerimen ótkizgen «dóńgelek ústelde» N.Á. Nazarbaevtyń qoǵamdyq kelisim men jalpyulttyq birliktiń qazaqstandyq modeli tanystyryldy, sondaı-aq «Qazaqstan - Ózbekstan» dostyq qoǵamyn qurý týraly ýaǵdalastyqqa qol jetkizildi. Yntymaqtastyq boıynsha birlesken ǵylymı-zertteý jáne aǵartýshylyq jobalardy damytý, shekara boıyndaǵy yntymaqtastyq, ádebıet almasý, 2 el jastaryna arnalǵan is-sharalar ótkizý bóliginde naqty usynystar jasaldy.
