QHA-nyń OQO boıynsha ókildigi jetim balalarǵa qaıyrymdylyq aktsııasyn ótkizdi
ShYMKENT. QazAqparat - Qazaqstan halqy Assambleıasynyń Ońtústik Qazaqstan oblysy boıynsha ókildiginiń uıytqy bolýymen qaıyrymdylyq is-sharasy ótti. Arys qalasyndaǵy balalar úıiniń 10 tárbıelenýshisin óz qamqorlyǵyna alǵan assambleıa olarǵa qajetti mektep formasy men syrt kıimderdi tartý etti, dep habarlaıdy «QazAqparat» HAA tilshisi.
Aktsııa barysynda Assmableıanyń OQO boıynsha tóraǵasynyń orynbasary Muratáli Qalmuratov jas jetkinshekterge únemi qoldaý bolatynyn jetkizdi. Sondaı-aq, etnomádenı birlestikterdiń tóraǵalary balalardy aldaǵy jańa oqý jylymen quttyqtap, ystyq lebizderin bildirdi. Ózara túsinistik pen turaqtylyqtyń, birlik pen tynyshtyqtyń, baýyrmaldyq pen syılastyqtyń mán-maǵynasy týraly áńgimeledi. Balalarǵa arnaıy tigilgen mektep formalaryn tabystady.
Atalmysh sharadan keıin balalar oblystyq assambleıanyń jańa ǵımaratynda ornalasqan etnomádenı birlestikterdiń qyzmetimen tanysyp shyqty. Shymkenttegi oıyn-saýyq ortalyǵyna qydyryp, kóńilderin bir sergitip qaıtty.
Esterińizge salaıyq, bıyl jyl basynan beri QHA-nyń OQO boıynsha ókilderiniń úılestirýimen 27,6 mln. teńgeniń qaıyrymdylyq kómegi muqtaj jandarǵa berilgen bolatyn.
