«QHA-nyń basty mindeti - ultaralyq tatýlyqty barynsha nyǵaıta túsý» - aýǵan ortalyǵynyń tóraǵasy Vastok Ahmadýlla
Bul týraly QazAqparat tilshisine «Arıana» aýǵan ortalyǵynyń tóraǵasy, QHA tóraǵasynyń orynbasary Vastok Ahmadýlla málimdedi. Onyń aıtýynsha, qazir álemde Qazaqstandaǵydaı ulttyq saıasatqa barynsha kóńil bólip otyrǵan el kemde-kem. Munyń aıqyn dáleli - Qazaqstan halqy Assambleıasy. Ol elimizde memlekettik mártebege ıe uıym. «18 sáýir kúni ótken XXI sessııada Elbasy Assambleıaǵa jańa mindetter júktedi. Bul - bizge artylyp otyrǵan úlken senim. Eldegi áleýmettik-ekonomıkalyq jaǵdaıdyń turaqtylyǵyna Qazaqstan halqy Assambleıasy da úles qosyp keledi. Assambleıada qazir aldaǵy bir jyl ishinde atqarylar sharalardyń naqty jospary belgilendi. Ótken jyly Elbasy Qazaqstan halqy Assambleıasynyń 2020 jylǵa deıingi damý tujyrymdamasyna qol qoıǵan bolatyn. Osy baǵytta qazir qarqyndy jumystar júrgizip jatyrmyz. Bir ǵana mysal, ótken jyly sáýir aıynda ǵylymı-saraptamalyq top quryldy. Onyń mindeti - eldegi etnosaıası, konfessııaaralyq jáne áleýmettik-ekonomıkalyq jaǵdaıdy ǵylymı turǵyda zertteý, zerdeleý, saraptaý, baǵa berý jáne boljaý. Al qyrkúıek aıynda Ulttyq kitaphanada Almaty Qazaqstan halqy Assambleıasynyń depozıtarııi ashyldy. Onda Assambleıanyń barlyq qujattary toptastyryldy. Endi kitaphanada Assambleıaǵa qatysty qujattarmen tanysýǵa bolady», - dedi Vastok Ahmadýlla. Sondaı-aq QHA tóraǵasy orynbasarynyń málim etýinshe, bıyl etnomádenı birlestikter «jastar qanatyna» erekshe kóńil bólýde. Osy baǵytta kóp uzamaı jastardy biriktiretin, jańa isterge bastaıtyn jańa uıym qurylmaq. «Bul jastarmen birge qoıan-qoltyq jumys jasaýǵa múmkindik beredi», - deıdi ol.
