QHA músheleri Shahanda otbasynan aıyrylǵan 7 jasar qyzdyń armanyn oryndamaq
QARAǴANDY. QazAqparat - Qaraǵandy oblysyndaǵy Qazaqstan halqy Assambleıasynyń músheleri Shahandaǵy oqıǵa kezinde otbasynan aıyrylǵan 7 jastaǵy Polına Andropovaǵa qol ushyn sozbaq. Polınanyń ata-anasymen kishkentaı sińilisi apat kezinde úıindi astynda qalǵan edi, dep habarlaıdy QazAqparat tilshisi.
«Biz Shahanda zardap shekken otbasylarǵa bardyq. Andropovtar otbasynyń týystarymen kezdesý kezinde, kishkentaı Polına bizden eshteńe suramady. Shamasy oqıǵadan áli eseńgirep júr. Qyz tek pıanıno týraly, endi mýzykalyq mektepke aspapsyz baratynyn aıta berdi», - deıdi QR Parlament Májilisiniń depýtaty, QHA múshesi, Qaraǵandy oblysyndaǵy Qoǵamdyq kelisim keńesiniń tóraǵasy Nurlan Dýlatbekov.
Oblystaǵy etnomádenı birlestik pen Qoǵamdyq kelisim músheleri Polınanyń armanyn oryndaý úshin qajetti qarajatty jınap qoıdy.
«1 qańtar kúni Shahanda oryn alǵan qaıǵyly oqıǵa árbir qazaqstandyqtyń júregin aýyrtty. Kómek barlyq oblystardan kelip jatyr. Aımaqtaǵy etnomádenı birlestikter de qalys qalmaı, oqıǵadan zardap shekken otbasylardyń birine qol ushyn sozýdy jón sanady, - deıdi «Vaınah» sheshen-ıngýsh etnomádenı birlestiginiń tóraǵasy Ývaıs Djanaev. - Andropovtar otbasynda kishkentaı qyz qaldy. Ol mýzykalyq mektepte oqıdy, bolashaqta pıanınoshy bolýdy armandaıdy. Biz oǵan pıanıno satyp almaqpyz. Aqsha jınalyp jatyr, qazir 500 myń teńge kóleminde qarajat jınaldy».
Aıta keteıik, Shahandaǵy oqıǵa kezinde Andropovtar otbasynan tek 7 jastaǵy Polına ǵana aman qaldy. Kishkentaı qyz týysqan aǵasymen basqa bólmede bolǵan. Abyroı bolǵanda, ol bólme zaqymdanbaǵan. Qazir Polına ájesimen birge turady. Ájeıdiń aıtýyna qaraǵanda, Polına qaıǵyly oqıǵany áli umytar emes, keıde «úıdiń edeni qırap ketpeı me?» dep surap qoıatyn kórinedi.
Eske sala ketsek, 1 qańtar kúni 22 saǵat 40 mınýttar shamasynda Qaraǵandy oblysynyń Tótenshe jaǵdaılar departamentine Shahan kentinde kópqabatty úıdiń qulaǵany jóninde arnaıy habar kelip túsken. Oqıǵa ornynan tótenshe jaǵdaılar qyzmetiniń kúsh-qurylymdary men arnaıy tehnıkalary jóneltilip, turǵyndardy evakýatsııalaý jumystary júrgizildi.
Qıraǵan úıdiń úıindilerinen 9 adamnyń máıiti tabyldy. Olardyń úsheýi er adam, úsheýi áıel adam, taǵy úsheýi balalar. Resmı tizimdi Qaraǵandy oblysynyń tótenshe jaǵdaılar qyzmeti usyndy.
Qıraǵan úıge qatysty materıal QR QK 292-baby 3-bóligi boıynsha biryńǵaı sot aldy tergeý tizilimine tirkeldi.
Qulaǵan úı 1987 jyly salynǵan. Ákimdiktiń aqparatyna sáıkes úıde 118 adam turǵan. Qulaǵan kireberiste 25 turǵyn bolǵan.
