QHA músheleri Qazaq-Túrik lıtseıiniń qurylysymen tanysty

ASTANA. 1 shilde. QazAqparat. 1 shilde kúni Qazaqstan halqy Assambleıasy Tóraǵasynyń orynbasary - Hatshylyq meńgerýshisi Eraly Luqpanuly Toǵjanov jáne Qazaqstan halqy Assambleıasynyń músheleri Almaty oblysy, Talǵar aýdany, Talǵar qalasynda bolyp, qurylysy júrip jatqan, áleýmettik az qamtylǵan otbasylardyń balalaryna arnalǵan 480 oryndyq jáne 300 adamdyq jatyn orny bar Qazaq-Túrik lıtseıiniń qurylysymen tanysty.

Áleýmettik jańarý salysyndaǵy osy joba Qazaqstan Respýblıkasy Táýelsizdiginiń 20 jyldyǵyna arnalǵan is-sharalar aıasynda, óziniń tarıhı otanynan arnaıy sheteldik ınvestıtsııa tartýdy qamtamasyz etken «Ahyska» Qazaqstan túrikteriniń qoǵamy» respýblıkalyq qoǵamdyq birlestigimen (basshysy Zııatdın Ismıhanovıch Kasanov) iske asyrýda.

Qurylyspen tanysý barysynda E.Toǵjanov áleýmettik jaýapkershilik jáne qoǵamdy áleýmettik jańartý máseleleri Assambleıa qyzmetiniń basty nazarynda tur dep atap ótti. Ol bul jobanyń birinshi emes ekenin, bunyń aldynda Qazaqstan halqy Assambleıasy sý tasqynynan zardap shekken Almaty oblysynyń Qyzylaǵash aýylyn qalpyna keltirýge belsendi qatysqanyn, qazir Batys Qazaqstan oblysyndaǵy sý tasqynan zardap shekkenderge qoldaý kórsetý boıynsha jumystar júrgizilip jatqanyn eske saldy. 2009 jyly Qazaqstan stýdentteri alıansymen birlese áleýmettik az qamtylǵan turǵyndarǵa, qarttar men múgedekterge kómek kórsetý jónindegi «Qamqor» aktsııasy ótkizilgen bolatyn. Aımaqtarda assambleıa músheleriniń balalar úıleri men qarttar úılerine qoldaý kórsetý boıynsha jumystary udaıy júrgizilip keledi.

Z.Kasanov qonaqtardy qurylys barysymen tanystyryp, Assambleıa músheleri Memleket basshysynyń etnomádenı birlestikterdi qoǵamdy áleýmettik jańartý isine tartý jónindegi tapsyrmasyn tolyq qoldaıtyndyǵyn atap ótti.

Nysannyń berilýi 1 qyrkúıekke josparlanǵan.