QHA músheleri áleýmettik-mádenı mańyzdaǵy nysandardyń qurylysyn aralyp kórdi
ANA. 1 shilde. QazAqparat - Qazaqstan halqy Assambleıasy Memleket basshysynyń Assambleıanyń HVII sessııasynda bergen tapsyrmasyn oryndaý maqsatynda
áleýmettik jaýapkershilik aıasyndaǵy, atap aıtqanda Assambleıa múshelerin qoǵamdy áleýmettik jańartýǵa, áleýmettik-mádenı maqsattaǵy obektilerdiń qurylysyna, eldi mekenderdiń turǵyn úı-kommýnaldyq baǵdarlamalaryn iske asyrý máselelerin sheshýge tartý boıynsha jumystardy jalǵastyrýda, dep habarlaıdy Qazaqstan halqy Assambleıasynyń baspasóz qyzmeti.
1 shilde kúni Qazaqstan halqy Assambleıasy Tóraǵasynyń orynbasary - Hatshylyq meńgerýshisi Eraly Luqpanuly Toǵjanov jáne Qazaqstan halqy Assambleıasynyń músheleri Almaty oblysynyń Talǵar qalasynda bolyp, qurylysy júrip jatqan, áleýmettik az qamtylǵan otbasylardyń balalaryna arnalǵan 480 oryndyq jáne 300 adamdyq jatyn orny bar Qazaq-Túrik lıtseıiniń qurylysymen tanysty.
Áleýmettik jańarý salasyndaǵy osy joba Qazaqstan Respýblıkasy Táýelsizdiginiń 20 jyldyǵyna arnalǵan is-sharalar aıasynda, óziniń tarıhı otanynan arnaıy sheteldik ınvestıtsııa tartýdy qamtamasyz etken «Ahyska» Qazaqstan túrikteriniń qoǵamy» respýblıkalyq qoǵamdyq birlestigimen (basshysy Zııatdın Ismıhanuly Qasanov) iske asyrýda.
Qurylyspen tanysý barysynda E.Toǵjanov áleýmettik jaýapkershilik jáne qoǵamdy áleýmettik jańartý máseleleri Assambleıa qyzmetiniń basty nazarynda tur dep atap ótti. Ol bul jobanyń birinshi emes ekenin, budan buryn Qazaqstan halqy Assambleıasy sý tasqynynan zardap shekken Almaty oblysynyń Qyzylaǵash aýylyn qalpyna keltirýge belsendi qatysqanyn, qazir Batys Qazaqstan oblysyndaǵy sý tasqynan zardap shekkenderge qoldaý kórsetý boıynsha jumystar júrgizilip jatqanyn eske saldy. 2009 jyly Qazaqstan stýdentteri alıansymen birlese áleýmettik az qamtylǵan turǵyndarǵa, qarttar men múgedekterge kómek kórsetý jónindegi «Qamqor» aktsııasy ótkizilgen bolatyn. Aımaqtarda assambleıa músheleriniń balalar úıleri men qarttar úılerine qoldaý kórsetý boıynsha jumystary udaıy júrgizilip keledi.
Z.Qasanov qonaqtardy qurylys barysymen tanystyryp, Assambleıa músheleri Memleket basshysynyń etnomádenı birlestikterdi qoǵamdy áleýmettik jańartý isine tartý jónindegi tapsyrmasyn tolyq qoldaıtyndyǵyn atap ótti.
Nysannyń berilýi bıylǵy 1 qyrkúıekke josparlanǵan.
