QHA medıatsııany damytý tujyrymdamasyn ázirleýdi usyndy
«Medıatsııa – jeńgender men jeńilgenderge bólmeıtin áleýmettik qural. Ol qos tarap úshin de tıimdi únemdeý men daýly máselelerdiń jyldam qaralýyna yqpal etedi. Biraq, Qazaqstandaǵy medıatsııa sot júıesiniń elementi bolatyn quqyqtyq ınstıtýt retinde jáne qoǵamnyń shıelenissiz damýyn qamtamasyz etetin qoǵamdyq ınstıtýt retinde qaralady jáne onda birqatar túıtkildi máseleler bar», - dedi QHA Hatshylyǵynyń meńgerýshisi Leonıd Prokopenko Leonıd Prokopenko elordada Dostyq úıinde ótken konferentsııada.
Onyń aıtýynsha, Qazaqstanda turǵyndar arasyndaǵy senim deńgeıin kóterý qajet.
«Medıatsııanyń damýy turǵyndardyń quqyqtyq sot júıesine degen senimine tikeleı baılanysty. Prezıdent Ákimshiligindegi azamattardy qabyldaýda 90% shaǵymnyń ádiletsiz sot úkimine qatysty ekenin kórdim. Ásirese, azamattar men memlekettik organdar arasyndaǵy daý-damaı azamattyq múddelerdi júzege asyrýǵa kedergi keltirip otyr», - dedi L. Prokopenko.
Sondaı-aq, QHA ókili medıatsııa ınstıtýtynyń ózin jetildirý men eldegi medıatsııany damytý tujyrymdamasyn ázirleý qajettigin atap ótti.
«Quqyq qorǵaý júıesindegi árbir sýbektiniń rólin anyqtaıtyn qosymsha mehanızmder kerek. Ýákiletti organnyń kómegimen halyqtyń medıatsııaǵa senimi men habardarlyǵyn kóterý mańyzdy. Eldegi medıatsııany damytý tujyrymdamasyn quratyn kez keldi dep oılaımyn. Biz qaıda bara jatqanymyzdy túsinip, qoǵamdyq, kásibı, sot medıatsııasynyń rólin uǵynyp, keleshegin josparlaýymyz qajet», - dedi Leonıd Prokopenko.
