QHA Májilis depýtattarynyń merziminen buryn saılaý ótkizý týraly úndeýine qoldaý bildirdi

ASTANA. QazAqparat - Qazaqstan halqy Assambleıasy QR Parlamenti depýtattarynyń elde merziminen buryn parlamenttik saılaý ótkizý jáne barlyq deńgeıdegi máslıhattardyń saılaýyn ótkizý týraly úndeýin tolyǵymen qoldaıdy. Bul týraly QHA-nyń úndeýinde kórsetilgen.

Qazaqstan halqy Assambleıasy, bul qadam Bes ınstıtýtsıonaldy reformalardy, Elbasynyń «Qazaqstan jańa jahandyq naqty ahýalda: ósim, reformalar, damý» atty Joldaýyn tıimdi iske asyrý úshin asa qajet, dep sanaıdy.

«QR Parlamenti Májilisiniń V shaqyrylymdaǵy depýtattarynyń quramy óziniń tarıhı rólin atqardy. Ulttyq zańnamaǵa el tarıhynda buryn-sońdy bolmaǵan keń kólemdi ózgerister engizýdi júzege asyrdy.

Prezıdenttik reformalar aıasynda qabyldanǵan zańdar memlekettiń, ekonomıkanyń, qoǵamnyń damýynda túbegeıli jańa quqyqtyq negiz qalyptastyrdy», delingen Assambleıanyń Májilis depýtattarynyń usynysyna qoldaý bildirgen úndeýinde.

Bul - JAŃA QAZAQSTANDYQ ARMAN - álemdegi 30 ozyq eldiń qataryna enýge jol ashyp otyr.

Memlekettik qurylystyń jańa kezeńinde, «Máńgilik el» jalpyulttyq patrıottyq ıdeıasynyń qundylyqtaryn bekitý, azamattyq qaǵıdaty negizinde jańa qazaqstandyq biregeılikti nyǵaıtý jáne damytý úshin eldiń joǵary zań shyǵarý organynyń jumysyna jańa sapa qajet.

Memleket basshysynyń tapsyrmalaryn oryndaý boıynsha el Úkimetimen sınhrondy jumysty qamtamasyz etý mańyzdy.

Kúrdeli jaǵdaıda zań ústemdigin qamtamasyz etý, ashyq úkimetti qalyptastyrý, Qazaqstan ekonomıkasynyń ári qaraı ósýine jaǵdaı jasaý jónindegi tereń reformalardyń tıimdiligi úshin Zań shyǵarý organynyń mandatyn jańartý - oryndy bastama.

«Biz Ult jospary, Parlament Májilisi depýtattarynyń jańa quramyn saılaý - barsha halyqtyń ekonomıkalyq jáne azamattyq belsendiligin arttyrý úshin qýatty qozǵaltqysh kúsh bolatyna senimdimiz.

Bul Prezıdenttik reformalardyń orasan zor baǵdarlamasyn iske asyrý, qoǵamdyq kelisim men jalpyulttyq birlikti nyǵaıtý úshin qajetti jaǵdaılar jasaýǵa múmkindik beredi.

Biz barlyq azamattardy - bizdiń ortaq múddemiz ben ortaq maqsatymyz úshin, bizdiń ortaq Otanymyz - Qazaqstan Respýblıkasynyń ósip órkendeýi jolynda parlament saılaýyn jáne barlyq deńgeıdegi máslıhattar saılaýyn merziminen buryn ótkizý týraly usynysty qoldaýǵa shaqyramyz», delingen habarlamada.