QHA qyzmeti aıasynda Túrkistan oblysynda saýyqtyrý ortalyǵy ashyldy
Ózbek etnomádenı birlestiginiń múshesi Sherzad Nıshanovtyń demeýshiligimen boı kótergen jańa medıtsınalyq ortalyq 70 orynǵa laıyqtalǵan. Investıtsııa kólemi 120 mln teńgeni qurap, 35 adam turaqty jumyspen qamtyldy.
Emdeý mekemesi fızıoterapııa, ishek joldaryn tazartý, nevrologııalyq jáne júrek emdeýge qajetti zamanaýı úlgidegi medıtsınalyq jabdyqtarmen tolyq qamtamasyz etilgen.
Ó. Shókeev Túrkistan oblysynda qarqyndy damyp kele jatqan medıtsına salasyndaǵy jetistikterge toqtalyp, memlekettik-jekeshelik ápitestikk aıasynda boı kótergen medıtsınalyq mekemelerdiń sany artqanyn atap ótti.
«Medıtsına salasyna tartylǵan ınvestıtsııa kólemi kún sanap artýda. Jekemenshik klınıkalar Ordabasy, Kentaý, Shardara aýdandarynda salynyp jatyr. Medıtsına salasyn damytýǵa jan-jaqty kúsh salynýda»,- dedi oblys ákimi.
Óz kezeginde, M.Ázilhanov Qazaqstan halqy Assambleıasynyń ınstıtýttary men qurylymdarynyń jergilikti jerlerde áleýmettik mańyzdy bastamalar men jobalardy iske asyrýǵa qatysýynyń mańyzdylyǵyn, bul azamattyq patrıotızmniń kórinisi, sondaı-aq qoǵamdyq kelisim men birlikti nyǵaıtýǵa mańyzdy úles qosatynyn atap ótti.
«Elimizdiń ońtústik bóligi, ásirese osy Túrkistan, Shymkent óńirlerinde, túrli ult ókilderi kóp shoǵyrlanǵan aımaq. Olar óz sharýalaryn dóńgeletip, tatý-tátti turyp jatyr. Olardyń basym bóligi jeke kásippen aınalysyp, sol aımaqtaǵy qarapaıym halyqty birqatar jumys oryndarymen qamtamasyz etýde. Ashylyp jatqan jańa medıtsına ortalyǵy da halqymyzdyń densaýlyǵyn jaqsartýda óz úlesin qosyp, keńeıip, budan da kóp azamattarymyzdy jumyspen qamtamasyz etedi dep senemin. Bul úlgi bolarlyq ıgi is»,- dedi Marat Ázilhanov.
Assambleıa Tóraǵasynyń orynbasary buǵan deıin Shymkent qalasy jáne Túrkistan oblysy Qazyǵurt, Saryaǵash, Tóle bı, Keles aýdandaryndaǵy QHA qurylymdarynyń basshylarymen, etnomádenı birlestikteriniń tóraǵalarymen kezdesip, Assambleıa aǵartýshylyq jáne áleýmettik-baǵdarlyq jumystarǵa basa nazar aýdarýy tıis ekenine toqtaldy. Sondaı-aq, etnomádenı birlestikter men olardyń belsendileri óz etnostarynyń toptarymen ózara tyǵyz baılanysta jáne jańa, ári tıimdi baǵytta jumys jasaý qajettiliginiń mańyzyn atap ótti.