QHA qostanaılyqtarǵa 18 mln teńgeden astam qarajat jınady

NUR-SULTAN. QazAqparat - Qazaqstan halqy Assambleıasy Qostanaı oblysynda órtten zardap shekkenderge 18 mln teńgeden astam qarjy jáne 110 tonna gýmanıtarlyq kómek jınady. Bul týraly QHA tóraǵasynyń orynbasary Taýfık Karımov málim etti, dep habarlaıdy QazAqparat tilshisi.

«Qostanaı oblysyndaǵy órt kóptegen adamnyń ómiri men ál-aýqatyna qaýip tóndirdi. Aýqymdy túrde materıaldyq jáne ekonomıkalyq zalal keldi. Memleket basshysy keshe jumys saparymen Qostanaı oblysynda bolǵanyn bilesizder. Prezıdent sapar barysynda Áýlıekól aýdanyndaǵy tabıǵı órtti joıý jumysynyń barysyn baqylady», - dedi Taýfık Karımov búgin QHA keńesiniń keńeıtilgen otyrysynda.

Onyń aıtýynsha, atalǵan óńirdegi tótenshe jaǵdaıǵa baılanysty el óńirindegi «Dostyq» úılerinde jedel túrde gýmanıtarlyq kómek uıymdastyryldy.

«Bul jumystan eshkim tys qalǵan joq. Qazirgi ýaqytta jınalǵan qarajattyń jalpy somasy 18 mln 113 myń teńgeni qurady. Sondaı-aq 110 tonna bolatyn gýmanıtarlyq kómek tıelgen júk kólikteri jóneltildi. Qarajat jınaý jalǵasyp jatyr», - deıdi ol.

Sondaı-aq QHA tóraǵasynyń orynbasary Qostanaı oblysynda volonterlik jáne qaıyrymdylyq jumysynyń úılestirilip jatqany týraly aıtty.

Buǵan deıin habarlaǵanymyzdaı búgin elordada Qazaqstan halqy Assambleıasynyń keńeıtilgen otyrysy ótti. Shara barysynda Assambleıa músheleri QR Prezıdenti Qasym-Jomart Toqaevtyń Qazaqstan halqyna Joldaýynda aıtylǵan basty jaıttardy ortaǵa saldy.

Foto: assembly.kz