QHA qoǵamdyq qurylymdary arqyly medıatsııa boıynsha 1 myńnan astam daý sheshildi - E.Toǵjanov

ASTANA. QazAqparat - Búgin Qazaqstan halqy Assambleıasynyń Qoǵamdyq kelisim jónindegi respýblıkalyq keńesiniń keńeıtilgen otyrysynda QHA men QR Joǵarǵy Soty arasynda medıatsııa ınstıtýtyn damytý týraly yntymaqtastyq jónindegi memorandýmǵa qol qoıyldy. Memorandýmǵa QHA Hatshylyǵy tarapynan QHA múshesi Leonıd Prokopenko, QR Joǵarǵy Sot tarapynan Sottar qyzmetin qamtamasyz etý departamentiniń jetekshisi Іlıas Ispanov qol qoıdy.

«2011 jyly Qazaqstanda «Medıatsııa týraly» zań qabyldandy. Osy zańnama aıasynda elimizde halyqaralyq medıatsııa ortalyǵyna tán tutastaı júıe qalyptasty. Dál osyndaı qurylym QHA mekemesi janynan jeke bólim retinde ashylǵan bolatyn», - dedi QHA Tóraǵasynyń orynbasary Eraly Toǵjanov. Onyń aıtýynsha, medıatsııa salasynda tetikterdi naqtylaý, sheshimder qabyldaý joldary boıynsha áli de atqarylatyn jumystar barshylyq. Sonymen qatar, ol medıatsııa ınstıtýtynyń qoǵamdyq kelisim úshin de, tutastaı el damýy úshin de naqty paıda ákeletinin atap ótti.

«Qazaqstanda qazirgi tańda kásibı medıatorlar sany 782 adam, kásibı emester - 1097 adam bolyp otyr. Olardyń arasynda daýlardy sheshý kórsetkishi de joǵary. Máselen, sheshimin tapqan daýlar 2041 bolsa, sonyń ishinde QHA qoǵamdyq qurylymdary arqyly sheshilgenderi 1024», - dedi E. Toǵjanov.