QHA - qıyn kezeńde halyqty ortaq múddege jumyldyryp, bir maqsat, bir bolashaqqa baǵyttaǵan uıym - Q. Sultanov
«Biz Táýelsizdigimizdi alǵan kúnnen bastap Elbasymyz Nursultan Ábishulynyń basty jobalarynyń biri el ishindegi tynyshtyqty, ózara túsinistikti, birlikti, yntymaqty qamtamasyz etý, sol arqyly ekonomıkalyq reformalar jasaý boldy. Óıtkeni Keńes odaǵy qulaǵan kezde, Baltyq jaǵalaýy, Orta Azııa, Kavkaz elderinde, tipti Reseıdiń óz ishinde de ultaralyq qaqtyǵystar bolyp jatty. Ár ult Keńes odaǵy kezinde kórgen qıynshylyqtaryn, qýǵyn-súrginin aıtyp, jaǵdaı odan saıyn ýshyǵyp turǵan edi. Sol kezde jalpy halyqty ortaq múddege jumyldyryp, bir maqsat, bir bolashaqqa baǵyttaýǵa arnalyp qurylǵan uıym - osy Qazaqstan halqy Assambleıasy bolatyn. Bul uıym bizdiń elimizde tuńǵysh ret quryldy, áli de kóptegen elderde mundaı ınstıtýt joq», - dep atap ótti ol.
Aıta keteıik, dáris-tanystyrylym 3-5 aqpan aralyǵynda Astana qalasynyń barlyq joǵary oqý oryndarynda ótkiziledi dep josparlanǵan. Sharany QR Prezıdenti janyndaǵy «Qoǵamdyq kelisim» respýblıkalyq memlekettik mekemesi QR Bilim jáne ǵylym mınıstrligimen birlese uıymdastyryp otyr. Dáris-tanystyrylym Qazaqstan halqy Assambleıasy jylynyń saltanatty bastaý alýyna oraılastyrylǵan.
Búgingi dáriske QR Parlamenti Májilisiniń depýtaty Qýanysh Sultanovpen qatar, «Obereg» ýkraın etnomádenı birlestiginiń jetekshisi Tamara Shırmer qatysty.
Uıymdastyrýshylardyń málimetinshe, 5 aqpanda kúni boıy Astana qalasynyń 11 ýnıversıtetinde dárister uıymdastyrý josparlanǵan. Onda QR Parlamenti Májilisiniń depýtattary, QHA Ǵylymı-saraptamalyq keńesiniń músheleri, Astana qalasyndaǵy etnomádenı birlestikterdiń basshylary jáne belgili qoǵam qaıratkerleri stýdentterge arnaıy dáris oqyp, óz oılarymen bólisedi.
