QHA Ǵylymı-sarapshylyq keńesiniń jumysy qorytyndylandy

ASTANA. QazAqparat - Qazaqstan óńirlerindegi ǵylymı-saraptamalyq toptar mańyzdy bastamalardy júzege asyrýda úlken kúshke aınaldy. Bul týraly Astanada QHA Ǵylymı-sarapshylyq keńesiniń keńeıtilgen otyrysynda QR Prezıdenti janyndaǵy QSZI dırektory Zarema Shaýkenova málim etti, dep habarlaıdy QazAqparat.

«El óńirlerinde qurylǵan ǵylymı-saraptamalyq toptar Memleket basshysynyń barlyq bastamalaryn joǵary deńgeıde júzege asyrýda úlken kúshke aınaldy. Sonymen qatar atqarylǵan jumystardyń keıbir qorytyndylaryn da jarııalaýdy jón kórip otyrmyn. Az ýaqyttyń ishinde, ıaǵnı bir jyldan sál astam merzimde QHA ǵylymı-saraptamalyq keńesi tarapynan 12 konferentsııa, 38 dóńgelek ústel ótkizildi, BAQ sarapshylarynyń 26 maqalasy jaryq kórdi. Munymen qosa, biz 78 suhbat berdik, telearnada 21 ret baǵdarlamaǵa qatysyp, qoǵamdastyqpen 15 kezdesý uıymdastyrdyq», - dedi QSZI dırektory.

Onyń sózine qaraǵanda, esepti kezeńde 20-dan astam saraptamalyq pikirtalas, 14 ádistemelik semınar, 17 dáris ótkizildi. Sondaı-aq stýdentter pikirtalastary uıymdastyrylyp, 4 pikirtalas klýbtary quryldy.

«Jalpy, atalǵan merzimdi aýqymdy jumystar atqaryldy. Oǵan Ǵylymı-sarapshylyq keńesine qatysýshy árbir adam óz úlesterin qosty», - dep naqtylady Z. Shaýkenova.

Budan bólek ol QR Prezıdentiniń baǵdarlamalyq maqalasynyń barlyq jobalary boıynsha sharalarǵa QHA Ǵylymı-sarapshylyq keńesi belsendi túrde qatysyp jatqanyn atap ótti.

«Atap aıtqanda, «100 jańa oqýlyq» jobasy aıasyndaǵy alǵash bolyp basylyp shyqqan 18 kitapty talqylaý men dáripteý baǵytynda eleýli jumystar atqaryldy. Sonymen qatar Ǵylymı-sarapshylyq keńes memlekettik tildi latyn grafıkasyna kóshirý turǵysynda ótkizip jatqan sharalardy aıryqsha atap ótken jón. Bul baǵytta aýqymdy jumystar júzege asyryldy. Biz bul sharalardy jalǵastyratyn bolamyz», - dep túıdi Zarema Shaýkenova.

Tastan Janatuly