QHA: Elbasy áleýmettik jaýapty memlekettiń saıasatyn dáıekti túrde júrgizýde

ASTANA. QazAqparat - Jańa Joldaýda áleýmettik saladaǵy máselelerge aıryqsha mán berilip otyr. Bul týraly búgin Astanada Elbasy Joldaýyndaǵy mindetterdi iske asyrýǵa arnalǵan QHA Keńesiniń keńeıtilgen otyrysynda Qazaqstan halqy Assambleıasy tóraǵasynyń orynbasary - Hatshylyq meńgerýshisi Leonıd Prokopenko málim etti, dep habarlaıdy QazAqparat.

«Jańa Joldaýdyń mazmuny Qazaqstan halqynyń ómir súrý sapasyn kóterýge negizdelgen. Osy oraıda onyń basty basymdyǵy el turǵyndarynyń ál-aýqatyn arttyrý bolǵandyqtan, Joldaý áleýmettik mánge ıe bolyp otyr. Atap aıtqanda, jahandyq qarjylyq-ekonomıkalyq turaqsyzdyqqa qaramastan, Elbasy áleýmettik jaýapty memlekettiń saıasatyn dáıekti túrde júrgizip keledi», - dedi Leonıd Prokopenko.

Osy oraıda ol 2019 jyldyń 1 qańtarynan bastap eń tómengi jalaqyny 1,5 ese, ıaǵnı 28 myńnan 42 myńǵa deıin ósirýdi mańyzdy áleýmettik bastama dep baǵalady. Bul óz kezeginde barlyq sala boıynsha túrli menshik nysandaryndaǵy kásiporyndarda jumys isteıtin 1 mıllıon 300 myń adamnyń eńbekaqysyna qatysty bolady.

QHA tóraǵasynyń orynbasary Joldaý aıasynda bıýdjettik mekemelerde jumys isteıtin 275 myń qyzmetkerdiń eńbekaqysy kóbeıip, orta eseppen 35 paıyzǵa ósetinin eske salyp ótti.

«Bul eńbekaqyny ósirý ǵana emes, sonymen qatar bizdiń azamattarǵa arnalǵan ınvestıtsııa. Osy turǵyda bizdiń ekonomıkaǵa ońtaıly yqpalyn tıgizedi», - dedi Leonıd Prokopenko.

Esterińizge sala keteıik, Joldaý barysynda Úkimetke óńdeý ónerkásibi men shıkizattyq emes eksportty qoldaý maqsatymen aldaǵy 3 jylda qosymsha 500 mıllıard teńge bólý tapsyryldy. Munymen qosa, basymdyǵy bar jobalarǵa qoljetimdi nesıe berý mindetin sheshý úshin Ulttyq bankke keminde 600 mıllıard teńge kóleminde uzaq merzimge qarjy bólý júkteldi.

«Osy qadamdardyń barlyǵy kásipkerler úshin jańa múmkindikter beredi. Ásirese, shetelderden ınnovatsııalar men ınvestıtsııalar tartatyn kásipkerler nazardan tys qalmaıdy», - dedi ol.