QHA el óńirlerinde qaıyrymdylyq sharalaryn uıymdastyrdy
Jumysty óńirlik «Qoǵamdyq kelisim» KMM qyzmetkerleri úılestirip, QHA-nyń barlyq qurylymdyq bólimderi: Qoǵamdyq keńes, Analar keńesiniń ókilderi, «Jańǵyrý joly» jastar qozǵalysynyń músheleri, barlyq etnomádenı birlestikterdiń ókilderi, QHA metsenattary, iri kásiporyn jumysshylary, «Volonter_2020», «Birlik» qozǵalysynyń músheleri, belsendi azamattar qatysty.
Búkil el boıynsha kórsetilgen gýmanıtarlyq kómektiń quramy men olardy alýshylardyń kóp aıyrmashylyǵy joq deýge bolady. Jınalǵan kómektiń basym bóligi turmysy tómen otbasylarǵa, kóp balaly analarǵa, múgedek jandarǵa, jalǵyzilikti kisilerge, ardagerlerge, indetpen kúreste demalyssyz jumys istep júrgen medıtsına, polıtsııa qyzmetkerlerine, zararsyzdaný jumysyna tartylǵan áskerılerge taratylyp berildi.
Áleýmettik paketter óńir erekshelikterine qaraı azyq-túlik sebetinen, maskalar men antıseptikterden, dári-dármekten, turmystyq hımııa zattarynan, balalarǵa birinshi kezekte qajetti zattardan quraldy.
Kelip túsken aqparat boıynsha, búgingi kúnge deıin respýblıkada qaıyrymdylyq kómek jáne #bizúıdemiz #mydoma, #BizBirgemiz aktsııalary sheńberinde jalpy eseppen 66 025 adamǵa 83 385 650 teńge kóleminde kómek kórsetilgen.
Aktsııalardan tys qalǵan óńirler joq. Olar Qazaqstan halqy Assambleıasynan basqa da uıymdar, jergilikti bılik organdary, saıası partııalar uıymdastyrǵan qaıyrymdylyq is-sharalaryna belsene qatysyp, otandastardy qoldaýǵa úlesterin qosýda. Sondyqtan bul jazbada erekshelengen birneshe óńirdi atap ótpekshimiz. Olar:
Almaty oblysynyń Analar keńesteri elde maska tapshylyǵy aıqyndalǵan alǵashqy kúnderi maskany qoldan tigý týraly úndeý jarııalady. Bul bastamany óńir áıelderi qyzý qoldady. Nátıjesinde, alǵashqy onkúndikte 10 417 maska tigilip, adamdarǵa tegin taratyldy.
Aqtóbe oblysynda 600 adamǵa 200-den astam áleýmettik paket pen 400-den astam maska taratyldy.
Aqmola oblysynda 2 000 adam 3 240 000 teńge kóleminde gýmanıtarlyq kómekke ıe boldy. Buǵan nemisterdiń «Vıdergebýrt» qoǵamdyq birlestiginiń músheleri úlken úles qosty.
Atyraý oblysynda 377 adam nebary 1 430 000 teńge kóleminde kómek aldy.
Batys Qazaqstan oblysynda 15 000 adam 1 772 200 teńgeniń kómegine qol jetkizdi.
Jambyl oblysynda 3667 adamǵa 1 546 970 teńge kóleminde kómek kórsetilýine óńirde tirkelgen 18 etnomádenı birlestik ókilderi uıymshyldyqpen qatysty.
Qostanaı oblysynda koreı etnomádenı birlestigi, polıaktardyń «Nadzieja» etnomádenı birlestigi, armıandardyń «Erebýnı» etnomádenı birlestigi, qyrǵyzdardyń «Asaba» qaýymdastyǵy, sheshen-ıngýshtardyń «Vaınah» etnomádenı birlestigi, ázerbaıjandardyń «Bırlık» qaýymdastyǵy jáne «Uly dala urpaqtary Qostanaı» qoǵamdyq birlestigi, oblystyq volonterlik qozǵalys ortalyǵy jumyla atsalysýynyń arqasynda 233 adamǵa 20 200 000 teńgege gýmanıtarlyq kómek kórsetildi.
Qyzylorda oblysynda «Qoǵamdyq kelisim» KMM rýhanı baǵyttaǵy jumystarǵa basymdyq berdi. #BizBirgemiz heshtegimen uly aqyn-jazýshylar shyǵarmashylyǵynan úzindiler oqý boıynsha aktsııa ótkizildi. Áleýmettik jelide ulttyq taǵamdar pisirý boıynsha aktsııa ótip, turmysy tómen otbasylaryn qoldaýǵa basym kóńil bólindi.
Mańǵystaý oblysynda Analar keńesiniń músheleri ózderi maska tigip, ony 6656 áskerı bóliminiń sarbazdaryna taratyp berdi. Onyń syrtynda 440 adamǵa 2 000 000 teńgege kómek kórsetildi.
Pavlodar oblysynda aptasyna eki, úsh ret 4532 adamǵa ystyq tamaq jetkizilip berilýde.
Túrkistan oblysynda óńirde tirkelgen etnomádenı birlestikterdiń qatysýymen 2510 adamǵa 32 471 850 teńge gýmanıtarlyq kómek jasaldy.
Shyǵys Qazaqstan oblysynda gýmanıtarlyq kómek jasaýǵa búkil aýdandyq «Qoǵamdyq kelisim» KMM-dary jumyla kiristi. Olardyń belsene qatysýynyń arqasynda shalǵaı aýyldardaǵy adamdar neǵurlym keńirek qamtyldy. Nátıjesinde 7 037 adam 8 037 630 teńge kóleminde kómekke qol jetkizdi.
Almaty qalasynda aktsııaǵa QHA qurylymdarynan basqa kásiporyndar men jeke azamattar da yqylaspen atsalysty. Qaıyrymdylyq aktsııasyna «Metall Prom Grýpp» JShS qatysýy 5160 adamǵa 1 600 000 teńge kóleminde gýmanıtarlyq kómek jasaýǵa múmkindik berdi.
Shymkent qalasynda 11 370 adamǵa 3 284 000 teńgege gýmanıtarlyq kómek kórsetildi. Onyń syrtynda 190 kg palaý pisirilip, oblystyq «Qoǵamdyq kelisim» KMM ony turmysy tómen otbasylaryna, basqa da muqtaj jandarǵa taratyp berýdi uıymdastyrdy.
Elordada qaıyrymdylyq kómektiń uıymdastyrylýyna QHA-nyń «Parasat» Qaıyrymdylyq qyzmetti úılestirý ortalyǵy, volonterler jáne Nur-Sultan qalasynda tirkelgen barlyq etnomádenı birlestikter belsene qatysty. Alǵashqy onkúndik nátıjesinde 1190 adamǵa 4 898 000 teńge somasynda gýmanıtarlyq kómek jasaldy.
