QHA-dan saılanǵan Májilis depýtattary jańa Tutynýshylar quqyǵyn qorǵaý agenttigin qoldaýǵa múddeli

ASTANA. 19 qarasha. QazAqparat - Qazaqstan halqy Assambleıasynyń depýtattyq toby jańadan qurylatyn Tutynýshylar quqyǵyn qorǵaý agenttiginiń qyzmetin belsene qoldaýǵa múddeli.

Bul týraly búgin QR Prezıdenti janyndaǵy Ortalyq kommýnıkatsııalar qyzmetinde ótken brıfıngte QR Parlamenti Májilisiniń depýtaty, Qazaqstan halqy Assambleıasynyń múshesi Egor Kappel aıtty.

«Men QR tutynýshylar quqyǵyn qorǵaý agenttigin qurý máselesine toqtalǵym keledi. Memleket basshysy sondaı agenttik qurý týraly Jarlyqqa qol qoıǵanyn bilesizder. Bul árbir qazaqstandyqqa aýadaı qajet qurylym, óıtkeni elimizdiń túkpir-túkpirindegi árbir azamattyń áleýmettik ahýaly sol agenttiktiń jumysyna tikeleı baılanysty bolmaq. Sondyqtan biz óńirlerdegi máslıhat depýtattary toptary arqyly atalǵan vedomstvonyń qyzmetin belsene qoldaýǵa múddelimiz», - dedi E. Kappel.