QHA: Biz pandemııanyń barlyq qıyndyqtaryn sátti eńserdik

NUR-SULTAN. QazAqparat – Qazaqstan halqy Assambleıasynyń ókilderi qazaqstandyqtardy Jańa jyl merekesimen quttyqtady, dep habarlaıdy QazAqparat Assambleıanyń baspasóz qyzmetine silteme jasap.

«Qymbatty otandastar!

Jańa 2022 jylmen shyn júrekten quttyqtaımyz!

Jańa jyl – barlyǵyna qýanysh, úı jaılylyǵy men bolashaqqa úmit syılaıtyn eń jarqyn jáne kópten kútken otbasylyq merekelerdiń biri.

Ótken jyl Qazaqstan Táýelsizdiginiń 30 jyldyǵymen tuspa-tus keldi.

30 jyl – bul qazaq memlekettiligin jańǵyrtqan jáne ata-babalarymyz armandaǵan erkindikke qol jetkizgen mańyzdy meje. Osy qas qaǵym ǵana sát jeńister men jetistikterge toly tutas bir dáýirdi qamtydy.

Azamattarymyzdyń danalyǵy men uıymshyldyǵynyń arqasynda biz berekeli Qazaqstan jerinde tatýlyq pen kelisimdi saqtap, halyqtyń birligin nyǵaıta aldyq. Táýelsizdik bizdiń alýan túrliligimizdiń kúsh pen damýdyń, jańa kózqarastar men jańa ıdeıalardyń qaınar kózine aınalǵanyn aıqyn kórsetti. Bizdiń sanymyz arta tústi – júrekteri birge soqqan 19 mıllıon qazaqstandyq bar. Biz pandemııanyń barlyq qıyndyqtaryn sátti eńserdik jáne yntymaq, ózara qoldaý men dostyq bizdiń maqtanyshymyzǵa aınaldy.

Qurmetti qazaqstandyqtar!

Kele jatqan Jańa jyl halqymyzdyń ómirindegi jańa jetistikter men baqytty sátterge toly bolsyn!

Árbir qazaqstandyq otbasynyń josparlary men armandary oryndala bersin, baqýattylyq artyp, shańyraq nyǵaıa bersin. Beıbitshilik pen tynyshtyq, balalar men jaqyndardyń densaýlyǵy zor bolyp, ár úıge baqyt ornasyn.

Otbasylaryńyzǵa beıbitshilik pen ózara túsinistik tileımiz. Sizderdiń úkilegen arman-tilekterińiz oryndalsyn!»,-delingen quttyqtaýda.