QHA bıylǵy jobalaryn jastar taqyrybyna arnamaq - Darhan Myńbaı
Búgin Almatydaǵy Dostyq úıinde elimizdiń etnomádenı ortalyq jetekshileri men qoǵamdyq birlestik ókilderiniń qatysýymen Elbasy Nursultan Nazarbaevtyń «Tórtinshi ónerkásiptik revolıýtsııa jaǵdaıyndaǵy damýdyń jańa múmkindikteri» atty Qazaqstan halqyna Joldaýyn talqylaýǵa arnalǵan jıyn ótti. Jıynda basty baıandama jasaǵan QHA tóraǵasynyń orynbasary - QR Prezıdenti Ákimshiligi QHA hatshyldyǵynyń meńgerýshisi Darhan Myńbaı 2018 jylǵy jobalardyń deni jastar taqyrybyna arnalǵanyn jetkizdi.
«Elbasy Joldaýyndaǵy mindetterdi qalaı júzege asyramyz degen máseleni talqyladyq. Assambleıa jastarmen jumys isteýdi negizgi basym baǵyttarynyń biri retinde alypotyr. Ozyq oıly jastardyń resýrstary mol. Biz aldaǵy sáýir aıynda barlyq jastar birlestikteriniń jetekshilerin Astanaǵa jınap, «Jańǵyrý» joly» qozǵalysynyń jumysyn bastaımyz. Shtab qurylyp, onyń atqaratyn jumystary naqtylanady. «Jańǵyrý joly» jastar qozǵalysy «Rýhanı jańǵyrý», «Qazaqstannyń úshinshi jańǵyrýy: jahandyq básekege qabilettilik» baǵdarlamasyndaǵy mindetter arqyly jastardyń damýyn qamtamasyz etedi», - degen Darhan Myńbaı 2018 jyly QHA tarapynan atqarylatyn basty jobalardyń deni jastar baǵytynda bolatynyn aıtty.
«Qoǵamdyq-saıası baǵytta Assambleıanyń 2018 jyly atqaratyn 11 arnaıy jobasy bar. 11 jobanyń barlyǵyn biz jastarǵa arnaıtyn bolamyz. Qazaqstan halqy Assambleıasynyń 26-shy sessııasyn ótkizgennen keıin, biz «Jańǵyrý joly» respýblıkalyq forýmyn ótkizemiz. Onda QHA tarapynan ázirlengen jastardyń áleýmettik jobalaryn tanystaramyz», - dedi ol.
