QHA bir jylda 44 myń balaǵa qazaq tilin oqytty

ASTANA. QazAqparat - Bıyl, Qazaqstan halqy Assambleıasy jyly 44 myń bala qazaq tilin úırengen. Bul týraly búgin Ortalyq kommýnıkatsııalar qyzmetinde ótken brıfıng barysynda QHA tóraǵasynyń orynbasary - sekretarıattyń hatshysy Eraly Toǵjanov málim etti.

E.Toǵjanov atap ótkendeı, Qazaqstan halqy Assambleıasynyń jyly aıasynda kóp maqsattar kózdelgen. Biraq, Assambleıa o bastaǵy josparlardy artyǵymen oryndap, jyldy jemisti aıaqtap otyr. «Biz jospardy artyǵymen oryndadyq. Memlekettik tildi damytý baǵytynda keminde 1000 balaǵa qazaq tilin úıretemiz dep josparlaǵan edik. Al, jyl qorytyndysy boıynsha 44 myń balaǵa memlekettik tildi oqyttyq»,-deıdi E.Toǵjanov. Sondaı-aq, qazaqstandyqtarǵa áleýmettik kómek retinde Qazaqstan halqy Assambleıasy «Meniń Qazaqstanym» aktsııasynyń aıasynda 50 myńnan astam adamǵa tegin medıtsınalyq kómek kórsetken. Al, «Qamqor» aktsııasy boıynsha, áleýmettik az qamtylǵan otbasylarǵa jalpy somasy 413 mln teńge kómek kórsetilgen.