QHA atynan saılanatyn depýtattardyń Senatta emes, Májiliste otyratyny tıimdi - OSK
"Qazaqstan Respýblıkasyndaǵy etnosaralyq qatynastar salasyn quqyqtyq retteý: etnosaralyq qatynastardyń jaı-kúıi men damý máseleleri" atty dóńgelek ústelge qatysqan OSK múshesi Marat Sársembaev Parlamenttiń tómengi palatasyndaǵy Assambleıa atynan saılanǵan depýtattar qoǵamdyq kelisimdi nyǵaıtatyn taraptyń biri, deıdi.
"Parlament Májilisine Assambleıa atynan saılanatyn toǵyz depýtattyń qyzmeti - elimizdegi etnosaralyq kelisimdi nyǵaıtýdyń bir quraly desek bolady. Májilistegi bul depýtattar tek óz etnosy nemese sol etnostyń atqarýshy uıymy atynan ǵana emes, Qazaqstandaǵy etnosaralyq kelisimge qatysty máselelerdi kóteredi. Onyń ústine, Assambleıa atynan saılanatyn depýtattardyń joǵarǵy palata - Senatta emes, Májiliste otyratyny áldeqaıda tıimdi. Sebebi, ózimiz biletindeı, zań jobalary Májiliste ázirlenedi, barlyq bastamalar Májiliste aıtylady. Meniń oıymsha, jalpy, memlekettik turǵyda kózqaras tanytatyn bolsaq, Assambleıa atynan saılanatyn depýtattardyń Májiliste jumys isteýi tıimdi",-dep atap ótti M.Sársembaev.
