QHA Astananyń Nur-Sultan atalýyna qatysty úndeý jarııalady
«Biz, Qazaqstan halqy Assambleıasynyń músheleri - etnomádenı birlestikterdiń, Ǵylymı-sarapshylyq keńesiniń, QHA kafedralary qaýymdastyǵynyń, Qoǵamdyq kelisim keńesteriniń, Analar keńesteriniń, Assambleıanyń jýrnalıster men sarapshylar klýbynyń, Medıatorlar keńesteriniń, Kásipkerler qaýymdastyǵynyń, «Jańǵyrý joly» respýblıkalyq jastar qozǵalysynyń, Assambleıanyń qoǵamdyq uıymdary men mekemeleriniń ókilderi, Astananyń ataýy Nur-Sultan bolyp ózgertilýin tutastaı jáne tolyǵymen qoldaımyz», - dedi Qazaqstan halqy Assambleıasy Tóraǵasynyń orynbasary Janseıit Túımebaev QHA-da ótken jıyn barysynda.
Onyń aıtýynsha, Astanaǵa Qazaqstannyń Tuńǵysh Prezıdentiniń esimin berý Elbasynyń táýelsiz Qazaqstandy qurýdaǵy asa zor eńbegin moıyndap, baǵalaý bolyp tabylady.
«Qazaqstan astanasyn kóshirý Nursultan Ábishuly Nazarbaevtyń strategııalyq jobasy jáne el tarıhynyń jańa betin ashqan bastamasy ekendigin erekshe atap kórsetemiz. Osy qadamnyń arqasynda Qazaqstan qıyn-qystaý ýaqytta ótpeli kezeńniń qıyndyqtaryn sátti eńsergen damý serpinine ıe boldy. Búginde, Elbasy el damýynyń jańa kezeńin ashqan kezde, Astanaǵa Qazaqstannyń Tuńǵysh Prezıdentiniń esiminiń berilýi búkil álemge Qazaqstannyń egemen, demokratııalyq, quqyqtyq jáne áleýmettik memleket retindegi damýynda Nursultan Nazarbaevtyń strategııalyq baǵytynyń ózgermeıtindigi ári sabaqtastyǵynyń belgisi bolyp tabylady», - dedi ol.
Úndeýdi oqyp bergen Janseıit Túımebaev Qazaqstan óziniń el damýyndaǵy konstıtýtsııalyq qaǵıdattar - qoǵamdyq kelisim men saıası ornyqtylyqtyń, ulysaralyq jáne konfessııaaralyq tatýlyqtyń, qazaqstandyq patrıotızmniń myzǵymaıtyndyǵyna nyq beıildilikti tanytatynyn aıtady.
«Saıası kóshbasshylyǵy men buljymaıtyn erik-jigeriniń arqasynda Elbasy elaralyq qatynastarda bıik adamgershilik standarttardy ornyqtyrdy, elimizdiń kópvektorly beıbitsúıgish syrtqy saıasatyn damytýǵa qosqan úlesi, ıadrolyq qarýsyzdaný jónindegi dáıekti kúsh-jigeri, halyqaralyq arenada senim men ózara is-qımyl atmosferasyn qalyptastyrǵany úshin halyqaralyq qaýymdastyqtyń tereń qurmeti men rızashylyǵyna ıe boldy», - deıdi Janseıit Túımebaev.
Onyń atap ótýinshe, Uly Dala eliniń budan keıingi urpaqtarynyń barlyǵy úshin Nursultan Nazarbaevtyń sińirgen tarıhı eńbegi halyqqa sheksiz berile qyzmet etýdiń jáne Azattyq pen Táýelsizdik ıdeıalaryna adaldyqtyń úlgisi bolýy kerek.
«Astananyń Tuńǵysh Prezıdent esimimen atalýy - bizdiń azamattyq paryzymyz jáne Qazaqstan halqynyń aldyndaǵy eńbegi úshin Elbasyǵa shynaıy rızashylyǵymyz. Qazaqstan astanasy Nur-Sultan bizdiń Qazaqstan ekonomıkalyq turǵydan qýatty jáne órkendegen el bolýy, al onyń azamattary barshylyqta, tatýlyq pen kelisimde ómir súrýi úshin bolashaq urpaqtar aldyndaǵy jaýapkershiligimizdi bildiredi. Biz Qazaqstan tarıhynda Nur-Sultan esimi «Máńgilik El» uǵymymen, jalpyulttyq tarıhı sanamen, joǵary rýhanı qundylyqtardyń ortaqtyǵymen ajyraǵysyz baılanysta qalatynyna nyq senimdemiz», - deıdi Janseıit Túımebaev.
Qazaqstan halqy Assambleıasy Tóraǵasynyń orynbasary otandastaryn «bir halyq, bir el, bir taǵdyr» qaǵıdattary negizinde shoǵyrlanýǵa shaqyrdy.
«Astanamyz Nur-Sultan qasıetti qazaq jerindegi birliktiń, tatýlyq pen órkendeýdiń sımvolyna aınalýy úshin biz qolymyzdan kelgenniń bárin de isteýimiz kerek!», - dep túıdi ol.
