QHA Analar keńesiniń tóraıymy «Qazaqstan halqyna qory» arqyly sheteldik bilikti dárigerlerdi shaqyrýdy usyndy
«Jalpy, Prezıdent suhbatynyń eń bir jaqsy jaǵy – el ishinde júrgen suraqtarǵa tike jaýap berildi. Bizge ózi eń keregi de sol. Tike suraqqa bılik oryndaryndaǵy adamdardyń tikeleı jaýap bergeni qajet. Bul qoǵam men bılik arasyndaǵy ózara senimdi arttyrýdyń kópiri dep esepteımin», - deıdi Analar keńesiniń jetekshisi.
Sondaı-aq, ol «Qazaqstan halqyna» qorynyń qarajatyn áleýmettik baǵytqa jumsaý boıynsha óz usynysyn aıtty.
«Ázirge qordyń atqaratyn sharalary men maqsaty áli naqtylanyp jatyr. Onyń jurt suranysyn, muqtajdyǵyn eskere otyryp retteletinine senimdimin. Ázirge kóp aıtylyp jatqan máseleniń biri – eldegi salmaqty syrqaty bar balalarǵa kómektesý. Osy másele boıynsha Qazaqstannyń azamaty retinde óz pikirimdi qosqym keledi», - deıdi Názıpa Shanaı.
Aıýynsha, «Asyl bala» degen uıymnyń jaqsy tájirıbesi bar. «Qazaqstan halqyna qory» arqyly emdeletin balalarǵa sol tájirıbe boıynsha qoldaý kórsetse, memleketke de, ata-anaǵa da tıimdi bolmaq.
«Ár balany jeke-jeke shetelge baryp emdetýdiń shyǵyny kóp. Ata-anasy jumysyn ysyryp qoıyp, saparlaýy kerek. Qarajattan bólek osyndaı da qıyndyqtary bar. Al dıagnozy bir balalardy jınap, olarǵa ota jasaý úshin bilikti sheteldiń mamanyn elge aldyrý, menińshe, tıimdi. Onyń eki jaǵy bar. Bir jaǵynan, bir jolda birneshe balany emdetip alýǵa bolady. Ekinshi jaǵynan, bizdiń dárigerler sol sheteldiń mamany kelgenin paıdalanyp, semınar ótkizip, tájirıbe almasady. Sondyqtan qordyń jumysyna osyndaı usynys aıtqym keledi. Qandaı da bir baǵytqa qarjy bólip jatqan kezde onyń tıimdiligine, ómir sapasyn arttyrýǵa naqty qandaı áseri bolatyny basty nazarda bolsa eken dep oılaımyn», - dedi QHA Analar keńesiniń tóraıymy.
