KFW: Qazaqstandaǵy alǵashqy sán aptalyǵy qalaı bastaldy
ASTANA. KAZINFORM – Qazaqstanda ótken eń alǵashqy sán aptalyǵyna nebári 2 otandyq dızaıner qatysqan. Bul týraly Saıat Dosybaev Jibek Joly arnasynyń «Búgin LIVE» aqparattyq-tanymdyq baǵdarlamasynda aıtty.
Spıkerdiń aıtýynsha, onyń sán salasyna kelýi shyǵarmashylyq bilimnen bastalǵan.
– Men jalpy kórkemsýret joǵary oqý ornyn bitirdim, keıin ózimniń kollektsııamdy jasadym. 90-jyldary meniń kórsetilimine Qaraǵandy televıdenıesinen jýrnalıst keldi. Ol maǵan “bizde jańa baǵdarlama ashylaıyn dep jatyr, sen soǵan saı kelesiń” dedi. Solaı alǵash ret televıdenıege shyqtym, – dedi ol.
Spıker sheteldegi alǵashqy tájirıbesin de eske aldy.
– Keıin ıtalııalyq dosym kómektesip, akkredıtatsııa aldyq, Mılanǵa bardyq, keıin Parıjge bardyq. Sol jaqtan reportajdar jasadyq. Túngi úshte turyp, efırge materıal daıyndaıtynbyz. Sosyn nege bizde de osyndaı podıým, modeldermen kórsetilim jasamasqa degen oı keldi? Almatyǵa kelgen soń osyny oılastyra bastadyq. Áriptesim Alekseı Djen Máskeýde edi, men ony shaqyryp “biz ózimiz osyndaı joba jasaýymyz kerek” dedim, – deıdi spıker.
Onyń aıtýynsha, alǵashqy kezeńde dızaınerler óte az bolǵan.
– Biz bastaǵanda dızaınerler joq edi. Kimdi kórsetemiz dep oıladyq. Sol kezde Aıda Kaýmenova men Quralaı Nurqadilova boldy. Ekeýimen Almaty Fashion Week jasadyq. Qalǵany sheteldik dızaınerler boldy. Olar Qazaqstandy qyzyq kórdi, “baı, munaıly el” dep keldi, – dedi ol.
Keıin joba birtindep keńeıgen.
– Sodan keıin dızaınerler shyǵa bastady. Astanadan, Qaraǵandydan, Shymkentten dızaınerler paıda boldy. Qazir sán aptalyǵy birneshe óńirde ótedi, – deıdi S. Dosybaev.
Sóz sońynda ol jobanyń qazirgi baǵytyn atap ótti.
– Qazir biz qazaqtyń ulttyq kıimin jáne dızaınerlerdi shetelde nasıhattap júrmiz. Reseıge baramyz, Túrkııada, Parıjde, Mılanda boldyq. Qazir bir dızaınerimiz Nıý-Iorkte kórsetilim jasap júr, – dedi Saıat Dosybaev.
Kazinform agenttiginiń analıtıkalyq sholýshysy sarapshylarmen birge Qazaqstandaǵy tigin ındýstrııasynyń mańyzyn, álemdegi ahýal men jaǵdaıdy jan-jaqty taldap kórdi.