KFW debıýtanty Dınara Sátjan jańa kollektsııasy týraly aıtty
ASTANA. QazAqparat - Tanymal telejúrgizýshi Dınara Sátjan QazAqparat tilshisine Kazakhstan Fashion Week-tegi sán úrdisteri men Qazaqstan sán aptalyǵyndaǵy debıýttik kollektsııasy týraly aıtyp berdi.
Burynǵy telejúrgizýshi Dınara Sátjan alǵash ret 2018\19 jyldyń kúz-qys mezgili pret-a-porte Sán aptalyǵyndaǵy jeke kıim jelisin tanystyrdy. Dızaıner qazaqstandyq sánqoılarǵa arnap jeńil jazǵy kıimderdi usyndy.
«Meniń kollektsııam kóktem men jaz mezgiline arnalǵan. Tipti, kórsetilim úshin sý men qustardyń saıraǵan dybystary bar mýzykany tańdadym. Astananyń turǵyny bola tura, kóshede jeńil kıimmen ketip bara jatqan almatylyqtardy kórgende, álemdegi eń sýyq astanada turatynymdy túsinemin. Bul kıim jelisi - meniń «jan aıǵaıym», - dedi Dınara Sátjan.
Dınara Sátjan kóılekterdi asa názik shıfonnan, shyttan, tordan jáne gúldi gıpıýrdan tikken.
«Sońǵy jyldary álem boıynsha hıpster stıli tanymaldylyqqa ıe bolýda, biraq bul da jaılap ótip jatyr. Bul zattar kóbine jasóspirim urpaqqa arnalǵan. Men stıldegi náziktikti qalaımyn. Meniń kıimim - meniń bolmysymdy, oıymdy kórsetip tur. Meniń jasap jatqan dúnıem qalyptasqan tulǵalar men áıelderge arnalǵan», - dedi dızaıner.
KFW qatysýshylary atap ótkendeı, 2018 jyldyń kóktem men jazynda qanyq jáne ashyq tústi kıimder sánge aınalmaq. Dızaınerler úlpildegen kóılek pen keń sándi beldemsheler usynýda. 
