QFF Leo Igıtanyń áreketine baılanysty málimdeme jasady
ASTANA. KAZINFORM – Áleýmettik jelide tarap ketken Almatynyń «Qaıraty» men Qazaqstan fýtzal quramasynyń qaqpashysy Leo Igıtanyń qatysýymen bolǵan beınejazba jankúıerlerdiń narazylyǵyn týǵyzdy.
Beınejazbada avtobýsqa qaraı kele jatqan Igıtanyń «Aqtóbe» men «Astana» fýtbol klýbtarynyń jalaýshalary men sharfynyń ústinen basyp ótkeni túsip qalǵan. Vıdeodan qaqpashynyń basynda mán bermegenin, keıin tómenge zer salǵanyn, sodan soń avtobýsqa kirgenin anyq ańǵarýǵa bolady.
Keıin Leo Igıta osy qylyǵy úshin «Aqtóbe» men «Astana» jankúıerlerinen keshirim surady. Sonymen qatar «Qaırat» fýtzal klýby tıisti shara qoldanylatynyn jetkizdi.
Osy oqıǵaǵa baılanysty Qazaqstan fýtbol federatsııasy arnaıy málimdeme jasady.
«Qazaqstan fýtbol federatsııasy ulttyq qurama men «Qaırat» AFK kapıtany Leo Igıta jáne ózge de almatylyq oıynshylardyń qatysýymen bolǵan jaǵdaı uıymnyń tıisti zań organymen qarastyrylatynyn málimdeıdi. Federatsııa mundaı jaǵdaıdyń aldaǵy ýaqytta qaıtalanbaýyna, oıynshylar arasynda etıka men kásibıliktiń joǵary deńgeıin ustap turýǵa, sondaı-aq jankúıerler arasynda osyǵan uqsas oqıǵalardyń aldyn alýǵa bar kúshin salady. Barlyq jaǵdaı zerttelip, qajetti tártiptik sharalar qabyldanady», - delingen onda.
