QFF kásibı týrnırler kúntizbesin qurýda jasandy ıntellekt júıesin engizip jatyr
ASTANA. KAZINFORM – Qazaqstan fýtbol federatsııasy fýtbol jarystarynyń kúntizbesin jasaý kezinde jasandy ıntellekt tehnologııalaryn qoldanatyn ınnovatsııalyq tásil iske qosylǵanyn habarlaıdy. Bul týraly QFF-nyń baspasóz qyzmeti habarlady.
9 aqpanda kúntizbeni jasaý sharasy josparlandy. Oǵan fýtbol klýbtarynyń ókilderi onlaın túrde qatysady. Talqylaý men kelisý nátıjeleri boıynsha daıyndalǵan kúntizbe Qazaqstan fýtbol federatsııasynyń Atqarýshy komıtetiniń bekitýine jiberiledi.
Joba Prezıdent Qasym-Jomart Kemeluly Toqaevtyń Qazaqstan halqyna Joldaýynda aıtylǵan zamanaýı tsıfrlyq sheshimder men jasandy ıntellekt tehnologııalaryn engizý mindetteri aıasynda júzege asyrylyp jatyr.
Jasandy ıntellekt Qazaqstan Premer-lıgasy, Birinshi jáne Ekinshi lıgalar, sondaı-aq áıelder arasyndaǵy fýtbol týrnırleriniń jarys kúntizbesin jasaý kezinde qoldanylady. Sheshim otandyq mamandardyń daıyndaýymen, adamı faktor qatysýyn boldyrmaıtyn, keńeıtilgen parametrlerdi eskerýge múmkindik beretin klassıkalyq Berger kestesine negizdele otyryp jasaldy.
Algorıtm stadıondardyń qoljetimdiligi, túrli aýa-raıy, klýbtardyń eýrokýboktarǵa qatysýy, FIFA-nyń halyqaralyq kúntizbesi, úıdegi jáne syrt alańdaǵy matchtardyń josparlanýy, ınfraqurylymnyń jalpy júktemesi, iri qalalyq is-sharalardyń ótkizilýi, sondaı-aq qaýipsizdik máseleleri men jekelegen matchtarǵa erekshe nazar aýdarý qajettiligin qosa alǵanda, sporttyq jáne uıymdastyrý sharttarynyń aýqymyn eskeredi.
Jasandy ıntellektti paıdalaný birneshe kúntizbe nusqasyn modeldeýge, qabyldanatyn sheshimderdiń saldaryn boljaýǵa jáne operatıvti túrde ózgerister engizýge múmkindik beredi. Bul maýsym kezinde matchtardy keıinge qaldyrý jaǵdaıyn edáýir tómendetedi.
Eske sala keteıik, buǵan deıin bıyl 12 sport nysany salynatynyn jazǵan edik.
