QFF fýtbol týrnırlerin «kúz-kóktem» júıesine ótkizýge daıyn
ASTANA. QazAqparat - Qazaqstannyń fýtbol týrnırlerin «kúz-kóktem» júıesi boıynsha ótkizý bastamasynyń ýaqyty jyljytylmaıtyn boldy.
Bul týraly búgin Astanada ótken Qazaqstan fýtbol federatsııasynyń onynshy esepti konferentsııasynda federatsııa prezıdenti Ádilbek Jaqsybekov sharaǵa qatysýshylardyń suraǵyna jaýap bergen kezde aıtty.
«Aqpan aıynyń sońynda el chempıonatyn «kúz-kóktem» júıesimen ótkizý týraly sheshim qabyldanǵan bolatyn. Qazir jobalyq-smetalyq qujattar daıyn, degenmen meniń oıymsha, bul máseleni shegere turý qajet sııaqty, óıtkeni keıbir aımaqtarda mundaı formattarda týrnır ótkizý bazalary áli daıyn emes», - dedi «Shahter» FK dırektory Erden Halılın.
Óz kezeginde Á. Jaqsybekov bul dúnıejúzilik talaptar ekenin jáne oǵan Qazaqstan qaı ýaqytta da daıyn bolý kerektigin eskertti.
«Biz 2015 jyldan bastap «kúz-kóktem» júıesine ótýge sheshim qabyldadyq. Buǵan deıin eki ret bul máseleni keıinge qaldyrǵanbyz, aımaq basshylaryna, klýb ıelerine jańalyqtarǵa daıyn bolyńdar dep eskertkenbiz. Endi barlyǵy daıyn bolýy qajet. Óıtkeni barlyq mamandar jańa formattyń artyqshylyqtaryn moıyndap otyr», dep atap ótti Á. Jaqsybekov.
Esterińizge sala keteıik, fýtbol chempıonattaryn ótkizý júıesin «kúz-kóktem» formatyna aýystyrý máselesi 2015 jylǵa shegerilgen bolatyn. Onyń basty sebepteri retinde fýtbol klýbtary ınfraqurylymynyń daıyn emestigi alǵa tartylyp kelgen.
