QFF Cherchesovtiń otstavkaǵa ketýi jóninde málimdeme jasady
ASTANA. KAZINFORM — Qazaqstan Fýtbol federatsııasy tek resmı aqparat kózderine senýge shaqyrdy.
— Fýtboldan Qazaqstan ulttyq quramasynyń bas bapkeri Stanıslav Cherchesovtiń qyzmetinen ketýi týraly keıbir buqaralyq aqparat quraldarynda jarııalanǵan aqparat shyndyqqa janaspaıdy. Qazirgi tańda Stanıslav Cherchesov Ulttyq quramanyń bas bapkeri qyzmetin jalǵastyryp, Qazaqstan fýtbol federatsııasymen kelisimshart boıynsha jumys isteıdi, — delingen habarlamada.
Qazaqstan fýtbol federatsııasynyń baspasóz qyzmeti tek resmı aqparat kózine, federatsııanyń resmı saıty men áleýmettik jelilerinde jarııalanǵan aqparatqa senýge shaqyrady.
Eske sala keteıik, buǵan deıin Stanıslav Cherchesov aıyppul tóleıtin bolǵanyn jazǵan edik. Sebebi el quramasynyń Ulttar lıgasy aıasynda óz alańymyzda ótken Slovenııamen kezdesýinen keıin oǵan PSJ jeıdesin kıgen jýrnalıst qazaq tilinde saýal qoıǵan edi. Bas bapker suraq qoıǵan jýrnalıstke «Frantsýz tilinde suraq qoıyp tursyń ba?» dep aıtqan bolatyn.
Bul jaǵdaı áleýmettik jelide kópshilik arasynda talqylandy. Bas bapkerdiń bul óreskel áreketi úshin Qazaqstan fýtbol federatsııasy tarapynan aıyppul salyndy. Aıyppul kólemi — 200 aılyq eseptik kórsetkish (738 400 teńge).
Artynsha QFF Stanıslav Cherchesov qazaq tili men elimizdiń mádenıetine úlken qurmetpen qaraıtynyn málimdegen bolatyn.
Osy tusta depýtattar shýlap, «tilimizdi taptaǵan Cherchesovke qaqpamyzǵa kirgen ár gol úshin 80 mln teńge tólep otyrmyz», — dep renjigen edi.