QFF Borodıýkti qyzmetinen bosatty
ASTANA. QazAqparat - Qazaqstannyń fýtbol federatsııasy ulttyq quramasynyń bas bapkeri Aleksandr Borodıýkpen kelisimshartty toqtatty, biraq bul jaıly resmı málimdeme jasaýǵa asyqpaı otyr, dep habarlaıdy «Sportınform» SAA tilshisi.
Borodıýk budan birneshe kún buryn qyzmetinen bosatylǵan, biraq federatsııa basshylyǵy bul aqparatty jarııalaýǵa asyqpaı otyr. Elimiz fýtbolynyń bas organy osy aqparatty jurtshylyqqa qandaı formada jetkizý jaǵyn oılastyryp jatqan bolar. Jýyq arada «Borodıýk otbasy jaǵdaıyna baılanysty qyzmetinen ketti» nemese «Nátıje kórsete almaýyna baılanysty bosatyldy» degen aqparattar taralýy múmkin. Árıne, áý basta reseılik mamannyń aldyna eshqandaı týrnırlik mindettemeler qoıylmaǵany, tek urpaqtar almasýyn júrgizip, qurama komandany kelesi irikteý kezeńine daıyndaý talap etilgeni belgili.
Borodıýktiń Qazaqstan quramasyndaǵy taǵdyry jeltoqsan aıynyń sońynda, ony quramaǵa shaqyrýǵa bastamashyl bolǵan federatsııanyń burynǵy bas hatshysy Qanysh Áýbákirov qyzmetten ketýge ótinish bergen kezde-aq belgili bolǵan. Onyń ornyna kelgen Azamat Aıtqojın reseılik mamannyń eńbek demalysynan kelýin kútetinin aıtqan bolatyn.
Aıta ketelik, A. Borodıýktiń kelisimsharty 2019 jyldyń aıaǵyna deıingi merzimdi kózdeıdi. Eger QFF ony óz bastamasymen buzatyn bolsa, bapkerge aıtarlyqtaı mólsherde ótemaqy tólenedi.
