QFF basshysy laýazymyna úmitker Berik Qanıev saılaýaldy baǵdarlamasyn tanystyrdy
ALMATY. QazAqparat- 28 aqpan kúni Qazaqstan fýtbol federatsııasynyń jańa prezıdentin saılaý ótedi, ony daýys berý arqyly federatsııanyń 26 múshesi saılaıdy.
Qazaqstan fýtbol federatsııasynyń basshysy laýazymyna negizgi úmitker, QFF atqarýshy komıtetiniń múshesi, kásipker, qoǵam qaıratkeri Berik Qanıev BAQ ókilderimen kezdesip, saılaýaldy baǵdarlamasymen tanystyrdy, dep habarlaıdy QazAqparat tilshisi.
Jýrnalıstermen kezdesý barysynda Berik Qanıev «Jas qyran» fýtbol ortalyǵy týraly aıtyp berdi. Qazirgi tańda ol jerde 250 bala bar. Olarmen 22 jattyqtyrýshy jumys isteıdi.
Sonymen qatar, Berik Qanıev óziniń saılaýaldy baǵdarlamasyn usyndy. Baǵdarlamanyń negizgi mıssııasy - «Fýtbol - Kazaqstan Halqyna».
Baǵdarlamada 11 negizgi tarmaq bar:
1. Buqaralyq fýtboldy damytýǵa jańa serpin berý
2. Balalar men jasóspirimder fýtbolyn basym damytý
3. Infraqurylymdy damytýdaǵy sapaly serpilis
4. Kadrlardy daıarlaý júıesin jetildirý
5. Qurama komandalar ınstıtýtyn júıeli damytý
6. Óńirlik federatsııalarmen ózara is-qımyl protsesin túbegeıli ózgertý
7. Kásibı fýtboldy qaıta júkteý
8. Fýtbol ındýstrııasyn tsıfrlandyrý
9. Memlekettik qoldaý sharalary
10. Transparenttilik qaǵıdaty jáne fýtboldaǵy sybaılas jemqorlyqty joıý
11.Marketıng strategııasyn ázirleý jáne ÝEFA jáne FIFA-men yntymaqtastyqty keńeıtý.
«Men Qazaqstanda fýtboldy jappaı nasıhattaý men damytýǵa baǵyttalǵan saılaýaldy baǵdarlamamdy usynamyn. Men elimizdegi fýtboldy jańa deńgeıge kóterý úshin aýqymdy jumys júrgizýdi josparlap otyrmyn. Bizdiń fýtbolymyz júıeli jańǵyrtýdy qajet etedi, balalar-jasóspirimder fýtbolyn, ınfraqurylymyn damytýǵa, ÝEFA jáne FIFA-men yntymaqtastyqty keńeıtýge jańa serpin berý qajet. Qazaqstandyqtar óz fýtbolshylaryn maqtan tutýy úshin fýtbolymyzdy birlesip damyta alatynymyzǵa senimdimin, - dedi QFF prezıdenti laýazymyna úmitker Berik Qanıev.
QFF basshysy laýazymyna bas úmitker Qanıev kásibı fýtboldy qaıta júkteý jumystaryn júrgizýge nıetti. Jumys sharalarynda legıonerlerdi jaldaý lımıtin qatańdatý jáne ony kezeń-kezeńimen tómendetý, memlekettik qarjylandyrýdan jeke qarjylandyrýǵa kezeń-kezeńimen kóshý, sharttyq oıyndardy joıý, tolyq ashyqtyq jáne qarjylyq eseptilikti jarııalaý kórsetilgen.
Eske salaıyq, Qazaqstan fýtbol federatsııasynyń jańa prezıdenti 28 aqpanda saılanady. KFF konferentsııasyna halyqaralyq fýtbol qaýymdastyǵynan baqylaýshy retinde qatysatyn FIFA men ÝEFA ókilderi shaqyrylady.
