QFF basshylyǵyna Ádilbek Jaqsybekovtyń kandıdatýrasy usynyldy
ASTANA. QazAqparat - Búgin Qazaqstan fýtbol federatsııasynda ótken onlaın-konferentsııada aımaqtyq uıymdar Ádilbek Jaqsybekovtyń kandıdatýrasyn basshylyqqa usyndy , dep habarlaıdy QazAqparat tilshisi QFF-nyń baspasóz qyzmetine silteme jasap.
Resmı aqparatqa sáıkes, Qazaqstan fýtbol federatsııasynyń keńsesinde bas hatshy Azamat Aıthojın pen aımaqtyq federatsııalar ókilderiniń qatysýymen onlaın-konferentsııa uıymdastyryldy. Ondaǵy qaralǵan negizgi másele - 10 aqpan kúni Astanada ótetin federatsııanyń kezekten tys konferentsııasy.
Qazaqstan fýtbol federatsııasynyń prezıdenti Seıilda Baıshaqovtyń otsavkaǵa ketkeni belgili. Aımaqtyq federatsııalardyń ókilderi QFF prezıdenti ornyna Ádilbek Jaqsybekovtyń kandıdatýrasyn usynýdy biraýyzdan qoldady.
«Ádilbek Jaqsybekov buǵan deıin de elimizdiń fýtbol federatsııasyn basqarǵan bolatyn. Sol kezde otandyq fýtboldyń dárejesi kóterildi. Ulttyq qurama óz ónerimen jankúıerlerdi qýantty. Al ishki chempıonattyń dárejesi joǵary bolǵandyqtan, klýbtardyń oıyny turaqty, halyqaralyq matchtarda óneri tabysty boldy. Respýblıka boıynsha fýtbol ortalyqtary ashyldy. Myńdaǵan bala súıikti sport túrimen aınalysýǵa múmkindik aldy. Sondaı-aq, 2014 jyly Qazaqstanda alǵash ret ÝEFA-nyń Kongresi ótti. Bizdińshe, Ádilbek Ryskeldiulynyń basshylyǵymen fýtbolymyzdyń damýy jalǵasa beredi», - delingen federatsııa ókilderiniń úndeýinde.
Aıta ketken jón, kezekten tys konferentsııada daýys berý arqyly Qazaqstan fýtbol federatsııasynyń jańa prezıdenti saılanady.
