Kezinde «Qazaq dalasynyń batyry» atanǵan palýan Qajymuqanǵa kindik qany tamǵan jerinde áli kúnge eskertkish qoıylmaı keledi - A. Smaıyl
ASTANA. Sáýirdiń 21-i. QazAqparat /Qanat Mámetqazyuly/ - Búgin QR Parlamenti Májilisiniń jalpy otyrysynda Úkimet basshysynyń atyna saýal joldaǵan depýtat Aldan Smaıyl elorda tórinen ataqty palýan Qajymuqan Muńaıtpasulynyń eskertkishin turǵyzyp, palýannyń esimin óńirdegi bir aýdanǵa berý týraly másele kóterdi,
dep habarlaıdy QazAqparat.
«Astana jeri esimderi máńgilikke el esinde qalǵan asyl azamattarǵa kende emes. Solardyń biri - aty álemge máshhúr bolǵan teńdesi joq balýan Qajymuqan», degen depýtat batyrdyń ǵumyrynda baǵyndyrǵan belesterine de sholý jasady. Onyń aıtýynsha, Qajymuqan 1908 jyly Germanııanyń Kraýn qalasynda nemistiń jaýyryny jer ıiskemegen palýanyn jyǵyp álem chempıony atanady, 1909 jyly Rıgada, 1913 jyly Varshavada bolǵan jarystarda úlken altyn medaldi taǵy da jeńip alady. Argentınanyń astanasynda ótken álem chempıonatynda aldyna jan salmaıdy. 1911 jyly Ystambulda túrik palýanyn tize búktirip, qajy atanady. Budan keıingi jyldary Parıj ben Tokıoda, Býdapesht pen Berlınde, Praga men Londonda uıymdastyrylǵan dúnıejúzilik dodalarda da mereıi ústem bolǵan.
«Qajymuqannyń týǵan jeri Astanadan taıaq tastam jerde. Sol aýyldyń irgesinde palýannyń ata-aansy jerlengen zırat ta toz-tozy shyǵyp tur. Ony qalpyna keltirý ne oblys, ne aýdan ákimdiginiń oıynda joq. 1927 jyly Qazaq Avtonomııalyq Respýblıkasy Ortalyq atqarý komıtetiniń prezıdýmy «Qazaq dalasynyń batyry» degen ardaqty dáreje bergen palýanǵa kindik qany tamǵan jerde eskertkish te qoıylmaı keledi. Qajekeńniń esimi osyndaǵy aýdandarynyń birine berilse degen el tilegi de eskerilmeı jatyr. Sondyqtan da, qazaq tarıhyndaǵy dara tulǵa, erekshe kúsh ıesi Q. Muńaıtpasulyna elordada eskertkish ornatý jáne esimin aýdandardyń birine berý týraly usynysty qoldaýdy suraımyz», dedi depýtat A. Smaıyl.
