Kezekti ekıpaj «Soıýz TMA-18» ǵarysh kemesin qabyldap aldy
AIQOŃYR. Naýryzdyń 30-y. QazAqparat /Sara Qabıqyzy/ - «Baıqońyr» ǵarysh aılaǵynyń 254-shi alańyndaǵy qurastyrý-synaq korpýsynda dúısenbi, naýryzdyń 29-y kúni «Soıýz TMA-18» ǵarysh kemesiniń negizgi jáne qosalqy ekıpajdarynyń ekinshi jattyǵýy ótti,
dep habarlaıdy «Reseıǵarysh» agenttiginiń baspasóz qyzmetinen.
«Energııa» reseılik ǵarysh korporatsııasynyń birinshi vıtse-prezıdenti Nıkolaı Zelenşıkov ǵaryshkerlermen nusqaýlyq júrgizdi.
Negizgi ekıpajdyń músheleri - reseılik ǵaryshkerler Aleksandr Skvortsov, Mıhaıl Kornıenko jáne amerıkandyq astronavt Treısı Koldvel-Daıson «Soıýz TMA-18» ǵarysh kemesin qabyldap aldy, ondaǵy jeke zattarynyń ornalastyrylýyn, birinshi jattyǵý kezinde jáne skafandrlardy ólsheý kezinde aıtqan eskertýleri men usynys-tilekteriniń oryndalýyn tekserdi.
Jattyǵýdan keıin quramyna Aleksandr Skvortsov, Mıhaıl Kornıenko, Treısı Koldvel-Daıson, Aleksandr Samokýtıaev, Andreı Borısenko jáne Skotta Kellı kirgen eki ekıpajdyń da músheleri «Soıýz» zymyrantasymaldaǵyshyn qarap shyqty, sondaı-aq №2 aılaqtaǵy ǵarysh tarıhy murajaıynda boldy.
Kezekti ekıpaj mingen «Soıýz TMA-18» kemesiniń Halyqaralyq ǵarysh stansysyna sapary sáýirdiń 2-sine josparlanyp otyr.
