Kezekten tys saılaýdyń el birligin arttyryp, ishki saıası turaqtylyqty saqtaýdaǵy orny erekshe - Q. Toqaev
ASTANA. QazAqparat - Kezekten tys saılaýdyń el birligi men yntymaǵyn arttyryp, ishki saıası turaqtylyqty saqtaýdaǵy orny erekshe. Búgin Parlament Senatynyń jalpy otyrysynda Qazaqstan halqy Assambleıasy Keńesiniń kezekten tys Prezıdent saılaýyn ótkizý týraly usynysyn qaraý barysynda palata Tóraǵasy Qasym-Jomart Toqaev osylaı málim etti.
Sóz arasynda kezekten tys prezıdenttik saılaý ótkizý týraly bastama der kezinde kóterilgenine toqtalǵan Senat spıkeri, munyń álemde oryn alyp otyrǵan shıelenister men jahandyq ekonomıkadaǵy turaqsyzdyq jaǵdaıynda elimizdiń damyǵan elderdiń qataryna kirý maqsaty turǵysynan mańyzdy ekenin atap ótti. «Barsha qazaqstandyqtar keńinen qoldaý kórsetip otyrǵan bul usynystyń el birligi men yntymaǵyn arttyryp, ishki saıası turaqtylyqty saqtap qalýdaǵy orny erekshe bolmaq. Sondyqtan da, tarıhtyń san qıly kezeńderin abyroımen eńsere bilgen qazaqstandyq qoǵam álemdik júıedegi qazirgi qubylmaly jaǵdaıda Elbasymen birge jumyla otyryp, Prezıdent mejelegen aýqymdy isterdi odan ári jalǵastyrýy qajet. Búgingi kúni otandastarymyz álemde bedeli artyp otyrǵan Qazaqstannyń qol jetkizgen bıik belesterin árdaıym Elbasynyń esimimen tikeleı baılanystyrady. Prezıdenttiń halyq ıgiligi jolyndaǵy sińirgen qyzmetine ádil baǵasyn berip, rııasyz senedi», dedi Q. Toqaev.
Palata Tóraǵasy kezekten tys prezıdenttik saılaýdyń qajettiligin tereń sezinetinin de alǵa tartady.
Aıta keteıik, otyrys barysynda Parlament Senatynyń depýtattary Prezıdent atyna Úndeý joldap, onda kezekten tys Prezıdent saılaýyn taǵaıyndaý týraly máseleni qarastyrýdy surady.
