Kezekten tys saılaýdaǵy basym daýystyń ıegeri de Elbasy bolatyny daýsyz -Ó. Baıgeldı

Búgin QR Parlamenti Senatynyń jalpy otyrysynda «Qazaqstan Respýblıkasynyń keıbir konstıtýtsııalyq zańdaryna tolyqtyrýlar men ózgerister engizý týraly» zań jobasyna baılanysty sóz sóılegen senator Ómirbek Baıgeldı osylaı málim etti.

«Birazdan beri Elbasynyń ókilettigin uzartý jóninde qyzý jumys júrgizilgeni belgili. Reti kelmeıtin joldan bas tartqan Prezıdent, basqasha usynysty kóldeneń tartty. Árıne, referendýmnyń búgingi qoldaýshysy 5 mln. adamnan asqan bolsa, onyń nátıjesi qalaı bolatyny da túsinikti edi. Eger óz mezgiline deıin kútip baryp saılaý ótkizilse de búgingi qyzmettegi Elbasy sózsiz jeńiske jetedi. Kesip aıtýǵa quqymyz bolmasa da saıasatker retinde senimmen aıtatyn jaıymyz barshylyq. Kezekten tys saılaýdaǵy basym daýystyń ıegeri de Elbasy bolatyny daýsyz. Shyndyǵynda, kópshilik saıasatkerler saılaý saıyn halqynyń basym daýysyn ıelene beretin Nazarbaev fenomenine tańyrqaıdy. Bundaǵy sebep - el bolyp jetken jetistik», - dedi senator.

Onyń aıtýynsha, Qazaqstan bir kezderi álsiregen álsiz elden birden órkenıetter kóshine ilige aldy. «Bizdiń halyq óziniń Tuńǵysh Prezıdentiniń eren erligin de, sińirgen eńbegin de esh umytpaıdy. Bılikten úmit etip júrgender bolsa da olarǵa kezek keler, bálkim olardy da bir kezderi el-jurty tańdar. Alaıda, Elbasy taqta otyrǵanda, Prezıdent atta otyrǵanda halyq betin basqa jaqqa bura almasy anyq. Jol -Nursultandiki», - dedi Ó. Baıgeldi.