Kezekten tys saılaý ótkizý der kezinde jasalǵan aqyldy da parasatty sheshim - Májilis depýtaty
ANA. 3 aqpan. QazAqparat /Aıdar Ospanalıev/ - «Prezıdentimizdiń búkil eldiń qoldaýy men Konstıtýtsııalyq keńestiń sheshimin eskerip,
referendým ornyna kezekten tys saılaý ótkizý jaıly usynys berýi eldiń eldigin, halyqtyń teńdigin, quqyn qorǵaıtyn der kezinde jasalǵan aqyldy da parasatty sheshim dep oılaımyn», - dedi búgin Parlament Májilisiniń jalpy otyrysynda depýtat Ashat Bekenov.
Otyrysta «QR keıbir konstıtýtsııalyq zańdaryna tolyqtyrýlar men ózgerister engizý týraly» zań jobasyna qatysty ol «Búgin biz taǵy bir tarıhı sheshimniń aldynda turmyz», - dep atap kórsetti. «Táýelsizdik jaǵdaıynda elimiz basynan keshken ómirimizdi elestetetin bolsaq, Elbasy Nursultan Nazarbaevtyń tikeleı basqarýymen qurylǵan memleketimiz qanshalyqty ózgergenine kóz jetkizemiz. Biz halyqaralyq qurmetke ıe táýelsiz memleket qura aldyq. Onyń belgisi álemniń 60-qa jýyq memleketiniń ókili qatysqan EQYU-nyń Sammıti. Táýelsizdiktiń basty jetistigi - erkindik. Biz sol erkindikke ıe boldyq. Elimizdiń ekonomıkasy naryqtyq arnaǵa kóship, memlekettiń qaýipsizdik, qorǵanys, ishki ister júıesi quryldy. Eldiń aýmaqtyq tutastyǵy qamtamasyz etildi. Respýblıkamyzda Prezıdenttik basqarý júıesi naqtylanyp, nátıjesinde memleketimiz úlken jetistikterge jetti. Jańa úlgidegi Qazaqstan Respýblıkasynyń qos palataly Parlamenti quryldy. Bizdiń qaıta órleý jigerimiz ben múmkindikterimizdiń beınesi bolǵan elordamyz Astanamyzdy saldyq. Barlyq kórshiles eldermen kelissózder júrgizilip, shekaramyz aıqyndaldy. Bul el qaýipsizdigi men táýelsizdigi jolynda atqarylǵan zor tarıhı mańyzy bar oqıǵalar. Osynyń barlyǵy da Memleket basshysynyń eren eńbeginiń arqasynda qol jetkizgen jetistikter», - dedi depýtat.
