Kezekten tys Prezıdenttik saılaýǵa qatysý úshin taǵy eki adam ótinish berdi
ASTANA. 16 aqpan. QazAqparat /Aıdar Ospanalıev/ - 3 sáýirge belgilengen kezekten tys Prezıdenttik saılaýǵa qatysý úshin taǵy eki azamat Ortalyq saılaý komıssııasyna ótinish túsirdi.
OSK-nyń málimetteri boıynsha, ótinish bildirgenderdiń biri 1954 jyly týylǵan jambyldyq Gúldana Toqbaeva. Ekinshisi 1957 jyly týylǵan almatylyq Maıa Qaramaeva. Ázirge OSK-da bul azamattar týraly ózge málimet joq.
Osylaısha, 16 aqpandaǵy jaǵdaı boıynsha 3 sáýirge belgilengen kezekten tys Prezıdenttik saılaýǵa qatysý úshin Ortalyq saılaý komıssııasyna ótinish túsirgen azamattardyń sany - 13 adamdy qurady. Olardyń 2-ýin, ıaǵnı "Kenesary han" qoǵamdyq qorynyń prezıdenti Ýálıhan Qaısarov pen Astana qalasynyń turǵyny, ýaqytsha jumyssyz Qanat Esjanovty Ortalyq saılaý komıssııasy memlekettik tildi jetkilikti deńgeıde meńgermegenderine baılanysty QR Prezıdengttigine úmitker retinde tirkeýden bas tartyp, tıisti qaýly qabyldady. Al taǵy bir úmitker pavlodaryq zeınetker Záýre Masına saılaýǵa túsý jónindegi ótinishin qaıtaryp aldy.
Aıta keteıik, Prezıdenttikten úmitkerler retinde ótinish bergen azamattardyń ekeýi saıası partııalardyń atynan saılaýǵa túspek nıette. Atap aıtqanda OSK-ǵa osyǵan deıin «Nur Otan» Halyqtyq demokratııalyq partııasy usynǵan Elbasy Nursultan Nazarbaev ótinish berdi. Odan keıin Qazaqstannyń Kommýnıstik Halyqtyq partııasy atynan partııanyń hatshysy Jambyl Ahmetbekov qujat tapsyrdy. Al qalǵan úmitkerler ózderin ózderi usynǵandar.
Búginge deıin úsh kandıdat, atap aıtqanda qazirgi Memleket basshysy Nursultan Nazarbaev, zańger Sálim Óten jáne ekolog-ǵalym Musaǵalı Dýambekov lıngvıstıkalyq komıssııanyń synynan súrinbeı ótti jáne ózderin qoldaǵan saılaýshylardyń qoldaryn jınaýǵa kirisip ketti. OSK qabyldaǵan qaýlyǵa sáıkes, QR Prezıdenttigine kandıdatty qoldaǵan rastalǵan qoldardyń sany 91 010 qoldy quraýy tıis.
Al Prezıdenttik saılaýǵa qatysýǵa ózin-ózi usynǵan qalǵan kandıdattar mynalar: «Nur Islam» týrıstik fırmasynyń dırektory, Almaty oblysynyń turǵyny Qanat Týrageldıev, Pavlodar oblysynyń 55 jastaǵy turǵyny, ýaqytsha jumyssyz Nursıla Kúsetaıuly, «Bastıon- Ast» kúzet agenttigi» JShS-de kúzetshi bolyp isteıtin 48 jastaǵy Tolybaı Baımýrzın, «Attan, Qazaqstan» qozǵalysynyń jetekshisi Amantaı qajy Asylbek. Aıta keteıik, Amantaı qajy Asylbek saılaýǵa qatysýǵa ótinish bildirgenimen qatarynan eki ret lıngvıstıkalyq komıssııanyń otyrysyna kelmeı qaldy.
