Kezekten tys Prezıdenttik saılaýǵa qatysý úshin OSK-ge ótinish bergen azamattardyń sany 11-ge jetti

Bul týraly búgin jýrnalısterdiń saýaldaryna jaýap bergen Ortalyq saılaý komıssııasynyń hatshysy Baqyt Meldeshov málim etti.

«Prezıdenttikten úmitkerler retinde ótinish bergen azamattardyń sany 11 adamdy qurap otyr. Olardyń ekeýi saıası partııalardyń atynan saılaýǵa túspek nıette. Atap aıtqanda OSK-ǵa osyǵan deıin «Nur Otan» Halyqtyq demokratııalyq partııasy usynǵan Elbasy Nursultan Nazarbaev ótinish berdi. Odan keıin Qazaqstannyń kommýnıstik halyqtyq partııasy atynan partııanyń hatshysy Jambyl Ahmetbekov qujat tapsyrdy. Al qalǵan úmitkerler ózderin ózderi usynǵandar»,-dedi B.Meldeshov.

B. Meldeshev saılaýǵa qatysýǵa nıet bildirip, ózin-ózi usyný jolymen OSK-ǵa alǵash bolyp zańger Sálim Óten ótinish túsirgenin eske salyp ótti. Osy ýaqytta úmitker lıngvıstıkalyq komıssııanyń synynan ótip, qazir qol jınaýmen aınalysýda. Kelesi kezektegi ótinish bergen azamat «Kenesary han» qoǵamdyq qorynyń prezıdenti Ýálıhan Qaısarov. «Ózderińizge málim, lıngvıstıkalyq komıssııanyń emtıhanyn tapsyra almaǵandyqtan, biz keshe Ý.Qaısarovty tirkeýden bas tartý týraly qaýly qabyldadyq», - dedi B. Meldeshev.

Onyń aıtýynsha, úshinshi úmitker Musaǵalı Dýambekov te lıngvıstıkalyq komıssııanyń synyna súrinbeı ótip, qazir qol jınaýda. «Attan, Qazaqstan» qozǵalysynyń jetekshisi Amantaı qajy Asylbek saılaýǵa qatysýǵa ótinish bildirgenimen lıngvıstıkalyq komıssııanyń otyrysyna kelmeı qaldy. Budan keıin, «Nur Otan» partııasy usynǵan Elbasy Nursultan Nazarbaev saılaýǵa qatysýǵa ótinish berip, memlekettik tildi erkin meńgergendigin lıngvıstıkalyq komıssııanyń aldynda dáleldep berdi, qazir qol jınaýda.

Onyń aıtýynsha, atalmysh azamattardan keıin Prezıdenttikke úmitker retinde OSK-ǵa Astana qalasynyń turǵyny, ýaqytsha jumyssyz Qanat Esjanov ótinish bergen. Onyń izin ala «Nur Islam» týrıstik fırmasynyń dırektory, Almaty oblysynyń turǵyny Qanat Týrageldıev qujattaryn tapsyrdy. Al búgin pavlodarlyq zeınetker Zaýre Masına, Qazaqstannyń halyqtyq kommýnıstik partııasynyń hatshysy Jambyl Ahmetbekov, Pavlodar oblysynyń 55 jastaǵy turǵyny, ýaqytsha jumyssyz Nursıla Kúsetaıuly jáne «Bastıon- Ast» kúzet agenttigi» JShS-de kúzetshi bolyp isteıtin 48 jastaǵy Tolybaı Baımýrzın de Prezıdent laýazymynan úmitti ekendikterin bildirip, OSK-ǵa ótinish túsirgen.