Kezekten tys Prezıdenttik saılaýǵa qatysqysy kelgen úmitkerlerdiń sany 3 adamǵa azaıdy
ASTANA. 16 aqpan. QazAqparat /Aıdar Ospanalıev/ - 3 sáýirge belgilengen kezekten tys Prezıdenttik saılaýǵa qatysqysy kelgen úmitkerlerdiń sany 3 adamǵa azaıdy. Bul týraly búgin Ortalyq saılaý komıssııasynyń otyrysynda atalmysh komıssııa tóraǵasy Qýandyq Turǵanqulov málim etti.
Onyń sózine qaraǵanda, búginde osyǵan deıin OSK-ǵa kezekten tys Prezıdenttik saılaýǵa qatysqy keletindikterin bildirip, barlyǵy 11 adam ótinish túsirgen. Olardyń 2-eýin, ıaǵnı Ýálıhan Qaısarov pen Qanat Esjanovty OSK Konstıtýtsııa men «QR Saılaý týraly» zańnyń úmitkerlerge qoıatyn talaptaryna saı emes dep taýyp, Prezıdenttikke kandıdat retinde tirkeýden bas tartty. Al pavlodarlyq zeınetker Záýre Masına óziniń ótinishin qaıtaryp alǵan. «Osylaısha qazir Prezıdenttikten úmitkerlerdiń sany 8 adamdy qurap otyr»,-dedi OSK tóraǵasy.
Esterińizge sala keteıik, kezekten tys Prezıdenttik saılaýǵa úmitker 8 azamattyń 2-eýi saılaýǵa saıası partııalar atynan túsýge nıettenip otyr. Atap aıtqanda, Elbasy Nursultan Nazarbaevtyń kandıdatýrasyn «Nur Otan» Halyqtyq demokratııalyq partııasy, al Jambyl Ahmetbekovtyń kandıdatýrasyn Qazaqstannyń Kommýnıstik Halyqtyq partııasy usynyp otyr. «Al zańger Sálim Óten, ekolog-ǵalym Musaǵalı Dýambekov, «Attan, Qazaqstan» qozǵalysynyń jetekshisi Amantaı qajy Asylbek, «Nur Islam» týrıstik fırmasynyń dırektory Qanat Týrageldıev, pavlodarlyq ýaqytsha jumyssyz Nursıla Sovetqazy Kúsetaıuly jáne «Bastıon - AST» kúzet agenttigi» jaýapkershiligi shekteýli seriktestiginiń kúzetshisi Tolybaı Baımýrzın ózderin ózderi usynyp otyrǵan úmitkerler.
