Kezekten tys Prezıdenttik saılaýǵa qatysqysy keletinderdiń qatary kóbeıýde
ASTANA. 18 aqpan. QazAqparat /Aıdar Ospanalıev/ - Elimizde 3 sáýirde ótetin kezekten tys Prezıdenttik saılaýǵa qatysqysy keletinderdiń qatary kóbeıýde. Keshe keshkisin Ortalyq saılaý komıssııasyna saılaýǵa qatysqysy keletin Meıramkúl Qojaǵulova esimdi azamatsha ótinish berdi.
Bul týraly búgin Ortalyq saılaý komıssııasynyń baspasóz qyzmetinen habarlandy.
Baspasóz qyzmetkerleriniń málimetinshe, ótinish bergen adam 1961 jyly týylǵan, Aqtóbe qalasynyń turǵyny, Aqtóbedegi qoǵamdyq birlestikterdiń biriniń jetekshisi bolyp jumys isteıdi. Bul úmitker 2005 jyly ótken Prezıdenttik saılaýǵa qatysý úshin ótinish bergen, alaıda memlekettik tilden emtıhannan óte almaǵan.
Soǵan qaramastan, Meıramkúl Qojaǵulova bıyl kezekten tys Prezıdenttik saılaýǵa qatysýǵa taǵy da ótinish berip otyr. Sebebi, 2005 jyly emtıhannan óte almaǵan ol aqparat quraldarynyń ókilderine kelesi saılaýǵa taǵy túsetindigin málimdegen bolatyn.
