Kezekten tys prezıdenttik saılaý: kommýnıst T.Syzdyqov qazaq tilin erkin meńgergen
Mundaı sheshimdi búgin QR Prezıdenttigine kandıdattardy memlekettik tildi erkin meńgergendigin anyqtaý jónindegi lıngvıstıkalyq komıssııa shyǵardy.
Lıngvıstıkalyq komıssııaǵa Qazaqstannyń kommýnıstik partııasy atynan úmitker Turǵyn Syzdyqov dástúrli synaqtyń úsh kezeńinen ótkenin aıtqan komıssııa tóraǵasy M.Joldasbekov: «Birinshi synaqta «Bizdiń kúshimiz birlikte» degen taqyryptaǵy jazbasha jumys boldy. Taqyryp ashylǵan. 6 qate jiberipti. Onyń ishinde 3-eýi emle, 2-eýi tynys belgisi, 1-eýi stıldik qate. Aıtaıyn degenim, L.Qoıshıevadan keıin saýatty, taqyryby ashylǵan jumys osy Syzdyqov myrzanyń jumysy boldy», - dedi.
Komıssııa tóraǵasynyń aıtýynsha, ekinshi kezeńde úmitker Baýyrjan Momyshulynyń prozasynan úsh bettik mátin oqyǵan.
«Jaqsy oqydy. Biz oqyǵan mátindi túsindi me, túsinbedi me degen oımen barlyq úmitkerlerimizge suraq qoıyp júrmiz. Kóbi ne oqyǵanyn bilmeıtin edi. Al endi Syzdyqov myrza óz oqyǵan mátindi óte ádemi jaqsylap aıtyp berdi», - dedi ol.
Úmitker úshinshi synaqta «Astana - táýelsizdik tuǵyry» taqyrybynda 15 mınýt sóz sóılegen.
«Sátti taqyryp kelgen sııaqty. Jaqsy jaýap berdi. Sonymen bizdiń komıssııa músheleri rıza bolyp otyr. Qorytyndymyz, Turǵyn Ysqaquly Syzdyqov memlekettik tildi erkin meńgergen», - dedi M.Joldasbekov.