Kezekten tys Prezıdent saılaýynyń úgit-nasıhat naýqany zańbuzýshylyqtarsyz ótti deýge bolady - OSK hatshysy
ASTANA. 1 sáýir. QazAqparat /Aıdar Ospanalıev/ - Búgin kezekten tys Prezıdent saılaýyndaǵy Prezıdenttikke kandıdattardyń úgit-nasıhat jumystaryn júrgizetin sońǵy kún. Erteńnen bastap kandıdattarǵa jáne ózge de azamattarǵa úgit-nasıhat júrgizýge tyıym salynady.
Osyǵan oraı búgin jýrnalısterge suhbat bergen Ortalyq saılaý komıssııasynyń hatshysy Baqyt Meldeshovtyń aıtýynsha, úgit-nasıhat naýqany zańbuzýshylyqtarsyz ótti deýge bolady. «Degenmen úgit naýqany barysynda birshama kemshilikter boldy. Kandıdattardyń birqatary bılbordtary men syrtqy jarnamalarynyń ornalastarý merzimi keshiktirilgendigin aıtyp, shaǵymdandy. Degenmen bul máseleler jedel túrde sheshilip, kemshilikter túzetildi. Sondyqtan naýqan barysynda aıtarlyqtaı zańbuzýshylyqtar boldy dep aıta almaımyn»,-dedi OSK hatshysy.
Onyń sózinshe, Prezıdentikke kandıdattardyń úgit-nasıhat jumystary búgin túngi 24-00-de aıaqtalady. Alaıda osy ýaqytqa deıin ilingen barlyq bılbordar men plakattar, paraqshalar sol oryndarynda qalady. Olarǵa eshkim de tıispeıdi. «Eń bastysy erteńnen bastap kandıdattar nemese olardyń saılaýaldy shtabynyń ókilderi jáne elimizdiń jekelegen azamattaryna úgit júrgizýge tyıym salynady»,-dedi B.Meldeshov.
