Kezekten tys prezıdent saılaýynda shet memleketterde daýys beretin azamattar sany artýy múmkin - OSK
ASTANA. 1 sáýir. QazAqparat /Aıdar Ospanalıev/ - «3 sáýirge taǵaıyndalǵan kezekten tys Prezıdent saılaýynda shet memleketterde daýys beretin azamattar sany artýy múmkin»,- deıdi Ortalyq saılaý komıssııasynyń hatshysy Baqyt Meldeshov jýrnalısterge bergen suhbatynda.
OSK hatshysynyń aıtýynsha, ázirge kezekten tys saılaýda qansha memlekette qazaqstandyqtardyń daýys beretindigin naqty aıtý múmkin bolmaı otyr. «Bizde shet memleketterde júrgen qazaqstandyqtardyń daýys berýine arnalǵan 35 ýchaske bar. Keıbir memleketterde olardyń sany birnesheý. Osylardy saraptaı kelgende, keminde 30 memlekette daýys berý ótedi dep oılaımyn. Al daýys berýshilerdiń sany, osynyń aldynda Syrtqy ister mınıstrligi atap ótkendeı, 14 myńnan da asyp ketýi múmkin. Qazaqstan azamattary shet memleketterge shyǵarý kýáligin ala baryp, sol ózi barǵan elden daýys berýi múmkin. Sondyqtan syrt memleketterden daýys beretin azamattar sanyn sol elden daýys berýshilerdiń hattamalary kelgen soń ǵana bilýge bolady»,-dedi OSK hatshysy.
