Kezekten tys prezıdent saılaýyna qatysýshy daýys berýshiler sany 70 paıyzdan kem bolmaıdy - OSK hatshysy
ASTANA. 1 sáýir. QazAqparat /Aıdar Ospanalıev/ - «Kezekten tys Prezıdent saılaýyna qatysatyn daýys berýshiler sany belsendi saılaý quqyǵy bar azamattardyń 70 paıyzynan kem bolmaıdy»,-deıdi Ortalyq saılaý komıssııasynyń hatshysy Baqyt Meldeshov.
Bul týraly ol búgin jýrnalısterge bergen suhbatynda aıtty.
OSK hatshysynyń sózinshe, Ortalyq saılaý komıssııasy kezekten tys prezıdent saılaýynyń ótetindigi jóninde keń aýqymdy aqparattandyrý sharalaryn júrgizdi. Saılaýdyń ótetindigi halyq kóp jınalatyn oryndardyń barlyǵynda habarlandyrylýda jáne nasıhat jumystary júrgizilýde. «Buǵan qosa biz saılaýdyń ótetindigin buqaralyq aqparat quraldary arqyly da júrgizýdemiz. Sondyqtan saılaýshylardyń sany osyǵan deıingi saılaýlardan kem bolmaıdy degen oıdamyn»,-dedi B.Meldeshov.
Onyń aıtýynsha, saılaýshylardyń belsendiligi osyǵan deıingi Prezıdent saılaýy men Parlament saılaýynda da joǵary bolǵan. Buǵan qosa jaqynda, naqtyraq aıtqanda 27 naýryz kúni orny bosap qalǵan máslıhat depýtattarynyń ornyna basqa azamattar saılandy. «Bul saılaýda da saılaýshylardyń belsendiligi joǵary boldy. Al 3 sáýirde bolatyn saılaý kezekten tys Prezıdent saılaýy. Sondyqtan munda da saılaýshylar belsendilik tanytady degen oıdamyn»,- dedi OSK ókili.
