Kezekten tys Prezıdent saılaýyna qatysýǵa ótinish bergen adamdar sany 14-ke jetti
ASTANA. 16 aqpan. QazAqparat /Aıdar Ospanalıev/ - 3 sáýirge belgilengen kezekten tys Prezıdent saılaýyna qatysýǵa taǵy bir azamat ótinish berdi.
Bul týraly QR Ortalyq saılaý komıssııasynyń baspasóz qyzmeti habarlap otyr.
OSK baspasóz qyzmetiniń málimetterine qaraǵanda, ótinish bergen azamat 1968 jyly týylǵan Astana qalasynyń turǵyny Adalbek Qunanbaev. Ol elordadaǵy oqý oryndarynyń birinde tarıh páninen sabaq beredi.
Osylaısha 16 aqpandaǵy jaǵdaı boıynsha Prezıdenttik saılaýǵa qatysýǵa nıet bildirip otyrǵan azamattar sany 14 adamǵa jetti.
Olardyń 2-ýin, ıaǵnı "Kenesary han" qoǵamdyq qorynyń prezıdenti Ýálıhan Qaısarov pen Astana qalasynyń turǵyny, ýaqytsha jumyssyz Qanat Esjanovty Ortalyq saılaý komıssııasy memlekettik tildi jetkilikti deńgeıde meńgermegenderine baılanysty QR Prezıdenttigine úmitker retinde tirkeýden bas tartyp, tıisti qaýly qabyldady. Al taǵy bir úmitker pavlodaryq zeınetker Záýre Masına saılaýǵa túsý jónindegi ótinishin qaıtaryp aldy.
Prezıdenttikten úmitkerler retinde ótinish bergen azamattardyń ekeýi saıası partııalardyń atynan saılaýǵa túsedi. Atap aıtqanda OSK-ǵa osyǵan deıin «Nur Otan» halyqtyq demokratııalyq partııasy usynǵan Elbasy Nursultan Nazarbaev ótinish berse, onyń izin ala Qazaqstannyń Kommýnıstik Halyqtyq partııasy atynan partııanyń hatshysy Jambyl Ahmetbekov qujat tapsyrdy. Al qalǵan úmitkerler ózderin ózderi usynǵandar.
Búginge deıin úsh kandıdat, atap aıtqanda qazirgi Memleket basshysy Nursultan Nazarbaev, zańger Sálim Óten jáne ekolog-ǵalym Musaǵalı Dýambekov jáne «Nur Islam» týrıstik fırmasynyń dırektory Qanat Týrageldıev lıngvıstıkalyq komıssııanyń synynan súrinbeı ótti. Qazirgi tańda memlekettik tilden emtıhannan ótken azamattardyń ishinde Q.Týrageldıevten ózgeleri ózderin qoldaǵan saılaýshylardyń qoldaryn jınaýǵa kirisip ketti. OSK qabyldaǵan qaýlyǵa sáıkes, QR Prezıdenttigine kandıdatty qoldaǵany rastalǵan qoldardyń sany 91 010 -dy quraýy tıis.
Al Prezıdenttik saılaýǵa qatysýǵa ózin-ózi usynǵan qalǵan kandıdattar mynalar: Pavlodar oblysynyń 55 jastaǵy turǵyny, ýaqytsha jumyssyz Nursıla Kúsetaıuly, «Bastıon- Ast» kúzet agenttigi» JShS-de kúzetshi bolyp isteıtin 48 jastaǵy Tolybaı Baımýrzın, «Attan, Qazaqstan» qozǵalysynyń jetekshisi Amantaı qajy Asylbek, 1954 jyly týylǵan jambyldyq Gúldana Toqbaeva, 1957 jyly týylǵan almatylyq Maıa Qaramaeva.
