Kezekten tys Prezıdent saılaýyna qatysty naýqan bastalǵaly OSK-ǵa azamattardan 14 ótinish túsken
ASTANA. 11 naýryz. QazAqparat /Aıdar Ospanalıev/ - 3 sáýirge taǵaıyndalǵan kezekten tys Prezıdent saılaýyna qatysty naýqan bastalǵaly Ortalyq saılaý komıssııasyna azamattardan 14 ótinish tústi.
Bul týraly búgin Ortalyq saılaý komıssııasynyń kezekti otyrysynda atalmysh komıssııa tóraǵany Qýandyq Turǵanqulov málim etti.
Onyń sózine qaraǵanda, turǵyndardan túsken shaǵymdardyń bireýi OSK-nyń áreketterine baılanysty. Taǵy eki shaǵym saılaýaldy úgit naýqany barysynda oryn alǵan saılaý zańdaryn buzý áreketterine qatysty boldy. «Alaıda olardy tekserý barysynda úgit-nasıhat naýqanynda eshqandaı zań buzý faktileriniń oryn almaǵandyǵy málim boldy. Sondyqtan shaǵym ıelerine tıisti túsinikteme berildi. Taǵy 2 ótinish qaralýda», - dedi Q.Turǵanqulov.
Ol sózinde sondaı-aq óziniń sheshimi negizinde 3 sáýirge taǵaıyndalǵan kezekten tys Prezıdent saılaýyna baılanysty azamattar men qoǵamdyq birlestik ókilderiniń ótinishterin qaraýmen aınalysatyn jumys toby qurylǵandyǵyn atap kórsetti. Onyń quramynda Ortalyq saılaý komıssııasy men Bas prokýratýranyń, Baılanys jáne aqparat, Qarjy, Іshki ister jáne Ádilet mınıstrlikteriniń ókilderi bar. «Bul jumys toby Ortalyq saılaý komıssııasy janyndaǵy konsýltatıvti keńes berý organy bolyp tabylady. Jumysshy toptyń negizgi maqsaty - OSK-ǵa turǵyndardan túsken ótinishter men shaǵymdardy toptastyrý jáne jıi túsetin shaǵymdar boıynsha tıisti sheshim qabyldaý bolyp tabylady. Jumys tobynyń sheshimi ashyq daýys berý arqyly qabyldanady. Jumys tobynyń alǵashqy otyrysy búgin ótedi», - dedi OSK tóraǵasy.
