Kezekten tys prezıdent saılaýy naýqany barysynda OSK-ǵa azamattar men qoǵamdyq birlestikterden 317 ótinish tústi
ASTANA. 19 naýryz. QazAqparat /Aıdar Ospanalıev/ - Ortalyq saılaý komıssııasyna kezekten tys Prezıdent saılaýy naýqany bastalǵaly azamattar men qoǵamdyq birlestikterden 317 ótinish kelip tústi.
Bul týraly búgin 2011 jyldyń 3 sáýirine taǵaıyndalǵan Qazaqstan Respýblıkasy Prezıdentiniń kezekten tys saılaýynyń ótkizilýine baılanysty azamattar men qoǵamdyq birlestikterdiń ótinishterin qaraý jónindegi jumys tobynyń kezekti otyrysynda málim boldy.
Otyrys barysynda kún tártibindegi másele jóninde sóz qozǵaǵan jumys tobynyń múshesi Álııa Raqyshevanyń aıtýynsha, saılaý naýqany bastalǵaly Ortalyq saılaý komıssııasyna 317 ótinish kelip túsken bolsa, onyń 308-i ótinish te, 9-y shaǵym. «Shaǵymdardyń 2-ýi saılaý komıssııalary men onyń músheleriniń áreketterine baılanysty túsken. Taǵy 4 shaǵym memlekettik organdar men uıymdardyń jáne ondaǵy laýazym ıeleriniń saılaýǵa daıyndyqpen baılanysty áreketterine qarsy joldanǵan. Sondaı-aq 3 shaǵym saılaý zańnamalarynyń normalaryn buzý men saılaýaldy úgit-nasıhat naýqanymen baılanysty bolyp otyr. Shaǵymdardy qaraý barysynda onda kórsetilgen faktiler rastalǵan joq. Osyǵan baılanysty shaǵym ıelerimen tıisti túsindirý jumystary júrgizildi»,-dedi Á.Raqysheva.
Onyń sózinshe, OSK-ǵa túsken ótinishterdiń 299-yn Ortalyq saılaý komıssııasynyń ókilderi ózderi qarady. Al 2 ótinish OSK-nyń otyrystarynda qaraldy. 12 ótinish qaraý úshin ákimdikter men máslıhattarǵa sot, prokýratýra jáne ishki ister sııaqty ózge de birqatar organdarǵa joldanǵan. 4 ótinish qazir qaralý ústinde.
