Kezekten tys attestattaý quqyq qorǵaý organdarynyń talaı laýazymdy basshysyn jumsaq oryntaǵynan qoshtasýǵa májbúrledi - Qazaqstandaǵy jańa kadrlyq taǵaıyndaýlar
Óıtkeni kezekten tys ótken attestattaý olardyń talaıynyń jyly oryntaqtarynan qosh aıtysýǵa mábúrlese, keıbiriniń laýazymy tómendetilip, tipti quqyq qorǵaý organdary sapynan da shyǵarylatyndardyń esimderi belgili boldy. QazAqparat apta ishinde bolǵan osy jáne ózge de kadrlyq taǵaıyndaýlarǵa sholý jasaıdy.
Máselen, elimizdiń Іshki ister mınıstrliginiń aqparatyna sáıkes, Almaty qalalyq ishki ister departamenti Jol polıtsııasy basqarmasynyń bastyǵy Arman Sarbasov taıaý ýaqytta qyzmetimen qosh aıtysady. Sebebi, attestattaý komıssııasy ony qyzmettegi shekti jasyna jetti dep sheshim shyǵarypty. 26 jyl boıy jol polıtsııasy bólimshesinde taban aýdarmaı qyzmet etken A.Sarbasov batalon komandıri, Almaty men Almaty oblysy ІІD Jol polıtsııasy basqarmalary bastyǵynyń orynbasary bolyp qyzmet atqarǵan. Qazirgi qyzmetine 2008 jyldyń sáýirinde taǵaıyndalǵan ol nebári 5 aıdan keıin qyzmettik tártip talaptaryn buzǵany úshin quqyq qorǵaý organdarynan qýylǵan bolatyn. Degenmen 2009 jyldyń 25 sáýirinde sol kezdegi Іshki ister mınıstri Serik Baımaǵambetovtyń buıryǵymen qyzmetine qaıta oralǵan edi.
Aqtóbe oblystyq qarjy polıtsııasy departamentiniń basshysy Qaırat Bıjanov attestattaý komıssııasynyń synynan súrindi. Ony laýazymdy qyzmetine laıyqsyz dep tanyǵan komıssııa jyly oryntaǵyn sál tómendetýge usynys jasaǵan. 42 jastaǵy Q.Bıjanov Qostanaı oblysynyń Jetiqara aýdanynda dúnıege kelgen. Qostanaı aýyl sharýashylyǵy ınstıtýtyn, Qostanaı memlekettik ýnıversıtetetin bitirgen. Qyzmettik mansap jolyn qarapaıym ıspektorlyqtan bastaǵan ol Qostanaı oblystyq salyq polıtsııasynyń erekshe mańyzdy ister jónindegi aǵa ınspektory bolǵan. Qostanaı oblystyq ekonomıkalyq jáne sybaılas jemqorlyqpen kúres departamenti bastyǵynyń orynbasary qyzmetin atqarǵan. Qarjy polıtsııasy organdaryndaǵy jumys ótili - 16 jyl.
Elimizdiń keden organdarynda da birqatar laýazymdy qyzmetker, naqty aıtqanda óńirlik vedomstvolardyń 4 basshysy qyzmetinen ketti. Olar: Qaraǵandy oblystyq kedendik baqylaý departamentiniń bastyǵy Erǵalı Shıǵanbaev, Pavlodar oblystyq kedendik baqylaý departamentiniń bastyǵy Amangeldi Nuǵymanov jáne onyń orynbasary Nurlan Mustafın, Qyzylorda oblystyq kedendik baqylaý departamenti bastyǵynyń orynbasary Bolat Tursynbekov. Budan bólek taǵy da 10 laýazymdy qyzmetkerdiń laýazymdaryn tómendetýge usynys jasaldy.
Qazaqstan Respýblıkasy Aýyl sharýashylyǵy mınıstrligi veterınarlyq baqylaý jáne qadaǵalaý komıteti tóraǵasynyń buıryǵymen Batys Qazaqstan oblystyq aýmaqtyq ınspektsııasynyń bastyǵy bolyp Serik Ǵanıuly Qanatbaev taǵaıyndaldy. Jańa basshyny ujymǵa oblys ákiminiń orynbasary E.Salyqov tanystyrdy. Serik Qanatbaev 1964 jyly týǵan. Bıologııa ǵylymdarynyń doktory. Batys Qazaqstan aýyl sharýashylyǵy ınstıtýtyn, Qazaq memlekettik zań akademııasyn bitirgen. Eńbek jolyn týǵan jeri Qaztalov aýdanyndaǵy «Taldyqudyq» aýylynda 1980 jyly jumysshy bolyp bastaǵan. 1984-1989 jyldary Batys Qazaqstan aýyl sharýashylyǵy ınstıtýtynda oqyp, ony bitirgennen keıin 1989-1992 jyldary sol joǵary oqý ornynda kishi ǵylymı qyzmetker bolyp jumys jasaǵan. 1992-1995 jyldary - Búkilodaqtyq ǵylymı-zertteý ınstıtýtynyń aspıranty; 1995-1999 jyldary - «Plembıosıstema» embrıondar daıarlaýshy jetekshi mamany; 1999-2001 jyldary - «Jelaev astyq ónimderi» AQ zańger; 2002-2006 jyldary - Jáńgir han atyndaǵy Batys Qazaqstan agrarlyq-tehnıkalyq ýnıversıtetiniń oqytýshysy; 2006-2012 jyldary - Batys Qazaqstan ǵylymı-zertteý veterınarııalyq stansasy fılıalynyń dırektory. 2012 jyly Oral qalasynyń Derkól kenttik okrýgi ákimdiginiń bas mamany laýazymyna taǵaıyndalǵan.